लकडाउनको कारण यतिबेला विद्यालय तहमा अध्ययन गर्ने बालबालिकाहरुले औपचारिक शिक्षा लिन विद्यालय जान पाएका छैनन् । यस अवस्थालाई धेरै व्यक्तिहरुले समस्याको रुपमा लिएका छन् । यद्यपि हरेक समस्यामा नयाँपन चाहने र सकारात्मक भावमा रमाउने व्यक्तिहरुले भने समस्या भित्र नै सम्भावना पनि अवश्य भेट्याउँछन् ।

डिएन अधिकारी, प्रिन्सिपल, नेशनल मोडल इङ्गलिस स्कुल

यस पटकको लकडाउनलाई कसरी बालबालिकाले अवसरको रुपमा अपनाउन सक्छन् भन्ने सम्बन्धमा नेशनल मोडल इङ्गलिस स्कुलका प्रिन्सिपल डिएन अधिकारीले निम्न बुँदाहरु मार्फत आफ्नो सन्देश प्रवाह गर्नुभएको छ ।

क) विद्यार्थीहरु लामो लकडाउनको कारण अभिभावकसँगै रहने अवसर प्राप्त भएको छ । जसले गर्दा पहिलो कुरा त घरपरिवारसँग निकटतम सम्बन्ध विकास हुन सहयोग पुग्छ ।
ख) यसबाट बालबालिकाहरुमा व्यक्ति व्यक्तिबीच कुराकानी गर्ने क्षमताको विकासमा सहयोग पुग्छ ।
ग) समाजका समस्याहरुको तर्कसङ्गत विश्लेषण गर्ने अवसरको रुपमा यसलाई अपनाउन सकिन्छ ।
घ) यस बेलामा मनोरञ्जनको अलावा सन्देशमूलक भिडियोहरु हेरेर व्यावहारिक ज्ञान समेत हासिल गर्न सकिन्छ ।
ङ) ग्रामीण परिवेश एवं पारिवारिक वातावरणको महत्व बारे जानकारी लिन सक्ने सुअवसरको रुपमा समयको उपयोग गर्न सकिन्छ ।
च) आफ्नै घरमा उपलब्ध स्रोतसाधनको प्रयोगबाट बालबालिकाहरुले सीपमूलक दक्षता हासिल गर्न सक्छन् । जस्तै रोटी बनाउन, तरकारी पकाउन आदि ।
छ) परिवार नै राम्रो  संस्कार सहितकाे शिक्षा सिक्ने उपयुक्त गञ्तव्य बन्न सक्छ, भनिन्छ घर विद्यार्थीको लागि पहिलो पाठशाला हो ।
ज) अहिलेको जटिल परिस्थितिले उनीहरुलाई जिन्दगीभर जस्तोसुकै जटिल परिस्थितिलाई पनि सहजै स्वीकार गर्दै त्यसलाई सामना गर्ने क्षमता विकास गर्ने कार्यमा महत्वपूर्ण सहयोग पुर्याउन सक्छ ।
झ) बालबालिका प्रतिको माया र सौहाद्रताले उनीहरुले समाजमा आफूहरु सम्मानित व्यक्ति भएको अनुभुति गर्न सक्छन् ।
ञ) अहिले विद्यार्थीहरु भौतिक रुपमा विद्यालय जान नसकेपनि मिडासको एजुकेशन एप्स डाउनलोड गरेर निःशुल्क पढ्न सक्ने अवसर छ । जुन निकै प्रभावकारी छ ।
ट) टेलिफोन तथा विभिन्न अनलाइन माध्यमबाट आफ्ना शिक्षकशिक्षिकासँग अन्तरक्रिया पनि गर्न सकिन्छ । अन्य अनलाइन तथा युट्युबबाट ज्ञान हासिल गर्न सक्छन् ।
ठ) विद्यार्थीहरुले आफूले विकास गर्न चाहेका विभिन्न क्षमता विकासको लागि प्रयाप्त अभ्यास गर्न सक्छन् । जस्तै हस्तलेखन, वाककला, कथा लेखन, चित्रकला, गणित र विज्ञानको अभ्यास लगायत ।

अहिले मुलुक भौतिक रुपमा लकडाउन भएपनि हाम्रो लागि अन्य थुप्रै सम्भावनाहरु पनि छन् । बालबालिकाहरुले यसलाई नयाँ अवसरको रुपमा अपनाउन सक्छन् । जतिसक्दो सृजनशिल र मनोरञ्जनयुक्त बनाउन सक्छन् । यसमा अभिभावकको महत्वपूर्ण भूमिका रहने गर्छ । साथै अभिभावकले पनि बुझ्नुपर्छ कि यस्ता महाविपत्तिहरु पृथ्वीमा समय–समयमा आइरहेका छन् । यस परिस्थितिबाट मुक्ति पाउनको लागि सावधानी र सहनशिलता नै महत्वपूर्ण रहन्छन् । यसकारण जो जहाँ छौं, त्यहीँ सुरक्षित रहौं । खुसी रहौं, स्वस्थ रहौं । सबै अभिभावक र विद्यार्थीहरुलाई यही सन्देश दिँदै नयाँ बर्ष २०७७ को हार्दिक मंगलमय शुभकामना व्यक्त गर्दछु ।