मन्टेश्वरी शिक्षाका न्यूनतम आधारहरु के हुनुपर्छ ?
अहिले नेपालमा मन्टेश्वरीको नाममा जुन शिक्षा प्रदान गर्दै आइएको छ । यस किसिमको प्रि स्कुल तहको शिक्षा सञ्चालनको क्रममा विद्यार्थीका केही कुराहरुमा विद्यालय सञ्चालक सधैं सचेत हुनुपर्छ । विद्यार्थीको खानपान, व्यावहारिक शिक्षा, विद्यार्थीको निम्ति राम्रो संस्कारको विकास र बालमैत्री वातावरण लगायतका कुराहरुले नै सम्बन्धित विद्यालयले प्रदान गर्ने शिक्षाको गुणस्तरीयताका मापदण्डहरुको रुपमा लिन सकिन्छ ।
यसैबमोजिम हामीले यस विद्यालयमा व्यावहारिक शिक्षाको निम्ति पाठ्यक्रममा नै आधारित रहँदै श्रव्यदृश्य सामाग्रीको माध्यमबाट अध्ययन गराउने कार्यमा जोड दिइरहेका छौं ।

मन्टेश्वरी प्रति अभिभावकहरु पूर्ण ढुक्क हुन सक्ने अवस्था छ ?
नेपालमा अहिले मन्टेश्वरी शिक्षा प्रति अभिभावकहरु पूर्ण रुपमा ढुक्क भएर हाम्रो जिम्मेवारीमा बालबच्चालाई सुम्पिनुभएको हुन्छ । हामीले पनि सोही बमोजिम आफ्नो जिम्मेवारी वहन गर्नु आवश्यक रहन्छ । यसैकारण प्रयाप्त खेलकुद, मनोरञ्जन र खानपानमा हामी सतर्क नै छौं ।

बालबालिकाहरुको स्वास्थ्यमा कसरी सचेतना अपनाइरहनुभएको छ ?
हामीले बालबालिकाहरुलाई आफैंले उत्पादन गरेका खाद्यवस्तु नै उपलब्ध गराउनुपर्छ भन्ने मान्यता बमोजिम हामीलाई चाहिने खाद्य वस्तु स्थानीय कृषकहरुको सहकार्यमा उपलब्ध गराउने काम गर्दै आएका छौं ।
अहिले हामीले आफैं नै गाई पालन गरेर उत्पादन भएको स्वस्थकर दूध बालबालिकाहरुलाई उपलब्ध गराएका छौं । अहिले हामीले बालबालिकाहरुको निम्ति बिना विषादीका खाद्यवस्तु उपलब्ध गराएका छौं । साथै शिक्षालाई नाफामूलक भन्दा पनि हामी सेवामूलक बनाउनुपर्छ भन्ने रुपमा हामीले काम गरिरहेका छौं ।

कस्तो उद्धेश्यले विद्यालय सञ्चालन गर्नुभएको हो ?
हामीले विगत ३ बर्ष पहिले देखि यस बोहोराटार क्षेत्रमा प्रि स्कुल सञ्चालन गरेका हौं । त्यस समयमा वरपर अन्य प्रि स्कुलहरु सञ्चालनमा आउन सकेका थिएनन् । यस वरपर स्तरीय पूर्ण मन्टेश्वरी विधिमा आधारित विद्यालय नभएको कारण बालबालिकाहरुलाई स्थानीय स्तरमा नै मन्टेश्वरी शिक्षा उपलब्ध गराउने मान्यता बमोमिज हामी स्थापना भएका हौं । समयानुकुल आफूलाई परिवर्तन समेत गर्दै सोही बमोजिम हामी अघी बढ्दैछौं ।
हामीले बालबालिकाको मनोविज्ञान बुझेर सोही बमोजिम शिक्षा उपलब्ध गराइरहेका छौं । बालबालिकाहरुको निम्ति कसरी उनीहरुलाई सही तवरले निर्देशित गर्न सकिन्छ भन्ने मान्यताले हामीले काम गरिरहेका छौं ।

कुन उमेरका विद्यार्थीहरुलाई साथ लिनुभएको छ ?
अहिले यस विद्यालयमा २ बर्ष माथिका प्ले गु्रप देखि युकेजी सम्मका विद्यार्थीहरु अध्ययनरत छन् ।
मन्टेश्वरीमा भर्ना गर्नु रहर वा बाध्यता ? अभिभावकहरुको रुचि कस्तो पाउनुभएको छ ?
अहिलेका कामकाजी बाबुआमा कतिपय रहर मात्र नभई बाध्यताले समेत मन्टेश्वरीमा बालबालिका भर्ना गरेको अवस्था छ । जसले गर्दा डे केयरको रुपमा समेत मन्टेश्वरीमा बालबालिका भर्ना भएका छन् ।

मन्टेश्वरीमा भर्ना हुने विद्यार्थीहरुको निम्ति माया र आत्मियताको महत्व कस्तो रहँदो रहेछ ?
बालबालिकाहरुले यस समयको उमेरमा वरपरको वातावरणबाट समेत धेरै कुरा सिक्न सक्छन् । यस उमेर समूहका बालबालिकाहरुको निम्ति बाबुआमाको प्रयाप्त माया र साथको आवश्यकता पर्छ । तर बाबुआमाहरु आफ्ना बालबच्चाको निम्ति प्रयाप्त समय उपलब्ध गराउन नसक्दा मोबाइल, ट्याब्लेट, खेलौना लगायतसँग अलि बढी नजिक हुने वा एकोहोरो स्वभावका हुने अवस्था पनि छ । हामीले सञ्चालन गरेको यस मन्टेश्वरीमा भर्ना पश्चात् मानिस भन्दा प्रविधि सँग नजिकिएका त्यस्ता विद्यार्थीहरुलाई पनि डेढ–दुई महिनामा नै सही ट्रयाकमा ल्याउन सम्भव भएका छौं । यो हामीले उपलब्ध गराउने आत्मियता र स्नेहको कारण नै सम्भव भएको हो ।