गोविन्द भट्ट

नेशनल प्याब्सन अध्यक्ष, तारकेश्वर कार्यसमिति

विद्यार्थीले घरमै सिक्न सक्छन्ः

लकडाउनको कारण उत्पन्न भएको असहज परिस्थितिमा विद्यार्थीहरुले घरमै अनौपचारिक कुराहरु सिक्ने अवसर मिलेको नेशनल प्याब्सन तारकेश्वर कार्यसमितिका अध्यक्ष गोविन्द भट्टको धारणा छ । ऊहाँ भन्नुहुन्छ, ‘संस्थागत विद्यालयहरुलाई नेपाल सरकारले गरेको निर्देशन बमोजिम नै हामीले चैत ५ गते भित्र नै विद्यालयस्तरीय परिक्षा सम्पन्न गर्यौं तर त्यस भन्दा पछाडि सृजना भएको परिस्थितिको कारण रिजल्ट अहिले सम्म पनि प्रकाशन गर्न सकेका छैनौं । यद्यपि रिजल्ट प्रकाशन नहुँदैमा विद्यार्थी आत्तिनुपर्ने अवस्था रहँदैन ।

विद्यार्थीले सिक्नको लागि औपचारिक र अनौपचारिक गरी २ माध्यम हुने गर्छन् । औपचारिक शिक्षाको अलावा अनौपचारिक शिक्षाको समेत भूमिका महत्वपूर्ण रहने गर्छ । यस किसिमको अनौपचारिक शिक्षाको लागि अहिलेको समय निकै महत्वपूर्ण अवसर बनेको छ । जुन परिवारबाट नै प्राप्त हुन सक्छ । यस अन्तरगत संस्कार, आचरण, व्यावहारिक ज्ञान, सीप र दक्षता विकास एवं सामाजिक विषयवस्तुको अध्ययन लगायत पर्दछन् ।’

चर्चामा अनलाइन शिक्षा र यसको दायराः
नेशनल प्याब्सन समेत अनलाइन कक्षा सञ्चालनमा तयार रहेको बताउँदै भट्टले भन्नुभयो, ‘नेपाल सरकारले समेत अहिले अनलाइन कक्षा सञ्चालनलाई विशेष चासोको साथ लिएको छ । यस्तो अवस्थामा हाम्रो संगठन नेशनल प्याब्सनले पनि त्यसको स्वागत गर्दै आवश्यक छलफल अघी बढाएको छ । यद्यपि यसरी सञ्चालन गरिने अनलाइन कक्षा कत्तिको प्रभावकारी हुने हो त्यो अर्को कुरा छ ।’

अझै पनि उपत्यकामा नै रहेका सबै व्यक्तिको पहुँचमा इन्टरनेट सञ्जाल जोडिन नसकेको र यतिबेला अधिकांश बालबालिका कोरोना त्रासको कारण गाउँ फर्किएको अवस्थामा यस्तो अनलाइन कक्षालाई कत्ति व्यक्तिको पहुँचमा पु¥याउन सकिन्छ भन्ने विषय समेत अर्को चासोको विषय रहेको ऊहाँले बताउनुभयो ।

लकडाउन सम्बन्धमा भट्टको धारणाः
लकडाउन अझै पनि लम्बिन सक्ने अवस्था देखिएको छ । अहिलेको सबैभन्दा महत्वपूर्ण विषय नै कोरोनाले उत्पन्न गराएको परिस्थिति भएको कारण जसरी भएपनि यसलाई नियन्त्रणमा लिन नेपाल सरकारले आवश्यक पहल गर्नुपर्नेमा ज्ञानभूमि स्कुलका प्रिन्सिपल समेत रहनुभएका भट्टले विशेष जोड दिनुहुन्छ ।

ऊहाँ भन्नुहुन्छ, ‘कोरोनाले उत्पन्न परिस्थिति नियन्त्रणमा नआउँदै अन्यत्र पनि संक्रमण फैलिन सक्ने तर्फ सतर्क हामीले लकडाउनलाई खुकुलो बनाउनुहुँदैन । जहाँ बढी प्रभाव देखिएको छ, त्यस क्षेत्रलाई सिल गर्नुपर्ने अवस्था पनि रहन्छ । यस सम्बन्धी सम्बन्धित क्षेत्रका विज्ञहरु नै जानकार हुनुहुन्छ ।’ यस कार्यमा सहयोग पु¥याउने जिम्मेवारी सचेत नागरिकको समेत रहने भट्ट बताउनुहुन्छ ।

सबै पक्षलाई सही तवरले निर्देशित गर्दै अबका गतिविधिहरु सञ्चालन गर्नुपर्ने आवश्यकता समेत ऊहाँले औंल्याउनुभएको छ । राज्यले संस्थागत विद्यालयलाई शुल्क मिनाहाको लागि आग्रह गरेको परिस्थितिमा विद्यालयले शिक्षक र कर्मचारीलाई भुक्तानी गर्नुपर्ने तलब, बैंकको ऋण, ब्याज, घरभाडा लगायतलाई समेत विचार गर्दै आवश्यक निर्णय लिनुपर्नेमा समेत सम्बन्धित पक्षको ध्यानाकर्षण हुनुपर्ने बताउनुहुन्छ ।