काठमाडौँ, १४ चैत – प्रधानमन्त्री केपी शर्मा ओलीले सङ्क्रमणकालीन न्यायसम्बन्धी कार्यलाई सफल बनाउन सरकार प्रतिबद्ध रहेको बताउनु भएको छ। जवाफदेहीता निगरानी समिति र द्वन्द्वपीडित सङ्गठनद्वारा आयोजित राष्ट्रिय सम्मेलनमा सम्बोधन गर्दै प्रधानमन्त्रीले सत्य निरुपण तथा मेलमिलाप आयोग र बेपत्ता पारिएका व्यक्तिको छानबिन आयोगका कामलाई प्रभावकारी बनाउन सरकार आवश्यक सहजीकरण गर्न तयार रहेको उल्लेख गर्नुभयो।
प्रधानमन्त्री ओलीले अघिल्ला आयोगहरू सफल हुन नसकेको कारणको समीक्षा गर्दै आगामी दिनमा जिम्मेवार सबै पक्षले संयुक्त प्रयास गर्नुपर्नेमा जोड दिनुभयो। साथै, पीडितहरूलाई न्याय र परिपूरण सुनिश्चित गर्न सरकार सक्रिय रहने उहाँको प्रतिबद्धता थियो। शान्ति प्रक्रियालाई निष्कर्षमा पुर्याउन आवश्यक कानुन संसद्बाट पारित गरिसकेको स्मरण गराउँदै उहाँले प्रमुख दलहरूको परामर्शमा नयाँ सिफारिस समिति गठन गरिएको जानकारी दिनुभयो।
उहाँले नेपाली जनता अब हिंसात्मक बाटोबाट अलग भइसकेको र द्वन्द्वका घाउहरू बिर्सन चाहेको उल्लेख गर्दै गम्भीर मानवअधिकार उल्लङ्घन गर्नेहरूलाई कारबाही हुने स्पष्ट गर्नुभयो। जनयुद्धलाई सार्वजनिक बिदा दिने वा उत्सवको रूपमा मनाउने कुराले पीडितलाई थप पीडा दिने भन्दै उहाँले त्यसप्रकारका गतिविधिहरू आवश्यक नरहेको बताउनुभयो।
कार्यक्रममा नेपाली कांग्रेसका सभापति शेरबहादुर देउवा, नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ लगायत नेताहरूको उपस्थिति थियो। प्रधानमन्त्री ओलीले अन्तर्राष्ट्रिय समुदायको सहयोग आवश्यक भए पनि नेपालले आफ्नै मौलिक तरिकामा सङ्क्रमणकालीन न्यायलाई निष्कर्षमा पुर्याउने प्रयास गरिरहेको बताउनुभयो। साथै, सरकारको कुनै निकायमा कर्मचारी हटाउने विषयलाई सङ्क्रमणकालीन न्यायसँग तुलना गर्नु उपयुक्त नहुने भन्दै उहाँले अनावश्यक विवाद सिर्जना नगर्न आग्रह गर्नुभयो।
प्रधानमन्त्रीले मुलुकले सङ्घीय लोकतान्त्रिक गणतन्त्रको यात्रा तय गरिसकेकोले अब पछाडि फर्किन नसक्ने स्पष्ट पार्नुभयो।
© 2026 All right reserved to सेताेघर मिडिया नेटवर्क प्रा लि | Site By : Sobij
