काठमाडौँ, ३ चैत – प्रधानमन्त्री केपी शर्मा ओलीले समाजका सबै क्षेत्रमा महिला र पुरुषको समान सहभागिता सुनिश्चित गरिनु आवश्यक रहेको बताउनु भएको छ।
आज यहाँ आयोजित महिला नेतृत्व सम्मेलनको उद्घाटन गर्दै प्रधानमन्त्री ओलीले नेपाली संस्कृति र परम्पराले महिलालाई देवीसरह सम्मान गर्ने बताउँदै, परिवर्तनशील समाज निर्माणका लागि महिलाको समान सहभागिता अपरिहार्य रहेकोमा जोड दिनुभयो।
“रथका दुई पाङ्ग्राले मात्र समुचित गतिमा अघि बढ्न सक्छ। त्यसैगरी, समाजलाई समृद्धि र विकासको दिशामा लैजान पुरुष र महिलाको समान योगदान अनिवार्य छ,” उहाँले भन्नुभयो। प्रधानमन्त्री ओलीले सामाजिक न्याय र समानता स्थापित गर्दै गरिबी निवारणका लागि सरकारले निजी क्षेत्रसँग सहकार्य गर्नुपर्नेमा विशेष ध्यान दिइरहेको उल्लेख गर्नुभयो।
उहाँले राष्ट्रपति, प्रधानन्यायाधीश लगायतका विशिष्ट पदमा महिलाको पहुँच स्थापित भइसकेको र राजनीतिमा महिलाको सहभागिता उत्साहजनक रहेको बताए पनि केवल यत्तिमा सन्तुष्ट भएर बस्न नहुने धारणा राख्नुभयो। शिक्षा, उद्यमशीलता र रोजगारीका क्षेत्रमा समेत महिलालाई थप अवसर प्रदान गर्नुपर्नेमा प्रधानमन्त्रीले जोड दिनुभयो।
सरकारले निजी क्षेत्रसँग सहकार्य गर्दै उद्यम विकास र महिला सशक्तीकरणलाई प्राथमिकतामा राखेको उल्लेख गर्दै प्रधानमन्त्री ओलीले आर्थिक विकासका साथै सुशासन प्रवर्द्धन गर्ने प्रतिबद्धता व्यक्त गर्नुभयो। “हामी निरन्तर अघि बढ्नुपर्छ, पछाडि फर्किनुहुँदैन। ब्याक गियर केवल मोडमा मात्र प्रयोग गरिन्छ, राजमार्गमा होइन। लोकतन्त्र हाम्रो राजमार्ग हो,” उहाँले उदाहरण दिँदै भन्नुभयो।
प्रधानमन्त्री ओलीले कानुनहरू विकासमै टेवा पुग्ने गरी परिमार्जन गरिनुपर्ने बताउँदै, सम्मेलनबाट प्राप्त सुझावहरूलाई सरकारका नीति तथा कानुनी संरचनामा समावेश गर्ने प्रतिवद्धता व्यक्त गर्नुभयो।
कार्यक्रममा उद्योग, वाणिज्य तथा आपूर्तिमन्त्री दामोदर भण्डारीले सरकार औद्योगिकीकरण प्रवर्द्धन गर्न प्रतिबद्ध रहेको बताउँदै, सरकारी निकायमा स्वदेशी उत्पादनको उपयोग बढाउन आवश्यक सुधारहरू गरिरहेको जानकारी गराउनुभयो।
त्यस अवसरमा प्रधानमन्त्री ओलीले राष्ट्रिय फुटबल खेलाडी प्रीति राई र सामाजिक अभियन्ता रुक्साना कपालीलाई सम्मान गर्नुभयो।
© 2026 All right reserved to सेताेघर मिडिया नेटवर्क प्रा लि | Site By : Sobij
