काठमाडौं । चलचित्र मोदिबेनी सत्य घटनामा आधारित रहेर निर्माण गरिएको यसको निर्माण पक्षले जनाएको छ । सोमबार काठमाडौंमा एक समारोहबीच यो चलचित्रको गीत मन्जुरी…को भिडियो सार्वजनिक गर्दै निर्माण पक्षले सो कुरा बताएको हो । यो चलचित्र १८ श्रावणमा रिलिज हुने भएको छ ।

यो गीत इन्टरनेटमा ओएसआर डिजिटलको युट्युब च्यानल मार्फत पनि रिलिज गरिएको छ । मोदीबेनीको एक महत्त्वपूर्ण अंशको रूपमा यो गीत रहेको पनि कार्यक्रममा जानकारी गराईयो । एसडी योगी र विज्ञान पराजुलीको स्वरमा रहेको यो गीतमा एसडीकै संगीत रहेको छ । गीतलाई राम अविरल बिष्टले लेखेका हुन् ।

गीतको भिडियोमा अभिनेत्री वर्षा सिवाकोटी र नव अभिनेता अमर प्रताप श्रेष्ठले अभिनय गरेका छन् । उनीहरुको प्रेमसम्बन्धलाई गीतमार्फत दर्शाईएको छ । किरण थापाको कोरियोग्राफी रहेको यो गीतमा उत्सव दाहालको छायाङ्कन र भरत रेग्मीको सम्पादन छन् ।

नव अभिनेता श्रेष्ठले आफ्नो अभिनयको पहिलो पाइलामा नै सशक्त टिमसँग काम गर्न पाउँदा खुसी व्यक्त गरे । गीत सार्वजनिक कार्यक्रममा नव अभिनेता श्रेष्ठले आफ्नो पहिलो प्रयासलाई दर्शकले रुचाएको भन्दै खुसी व्यक्त गरे,‘पछिल्लो समय नेपाली चलचित्रमा धेरै नयाँ अनुहारहरूको प्रवेश भइरहेको छ, त्यो मध्ये एक बनेको छु। कला सहितको अभिनेता बन्ने सपना पछ्याउँदै मोदीबेनी मार्फत डेब्यु गरेको हुँ ।’

अभिनेत्री वर्षा सिवाकोटीले चलचित्र कथा मन परेर आफुले यसमो अभिनय गरेको बताईन् । अमर नव भएर पनि राम्रो काम गरेको वर्षाले बताईन् ।