काठमाडौं । पिसिआर परीक्षणका लागि तोकेभन्दा बढी शुल्क असुल्ने प्रयोगशालालाई सरकारले कारबाही गर्ने भएको छ ।

मंगलबार स्वास्थ्य तथा जनसंख्या मन्त्रालयले सुचना जारी गर्दै यस्तो जानकारी गराएको हो ।

सरकारले पीसीआर परीक्षणका लागि सरकारी प्रयोगशालामा १ हजार र निजी प्रयोगशालामा २ हजार शुल्क तोकेको छ ।

‘केही निजी प्रयोगशालाहरूले संक्रमण रोकथाम आदिको नाममा थप शुल्क लिएको भन्ने गुनासो आएकाले सरकारले तोकेको शुल्कभन्दा कुनै पनि बहानामा थप शुल्क नलिन स्वास्थ्य तथा जनसंख्या मन्त्रालय सम्बन्धित सबैमा जानकारी गराउँछ,’ मन्त्रालयद्वारा जारी सुचनामा भनिएको छ, ‘यदि लिएको पाइएमा राष्ट्रिय जनस्वास्थ्य प्रयोगशालामार्फत त्यस्ता प्रयोगशालाहरूलाई नेपाल सरकार प्रमुख विशेषज्ञ स्तरीय निर्णयअनुसार परीक्षणको सुचीबाट हटाइने व्यहोरा जानकारी गराइन्छ ।’