ग्यास बिक्रेता महासंघ नेपालले कठिन परिस्थितिमा व्यवसाय सञ्चालन कार्य जाेखिमपूर्ण रहेकाे भन्दै राज्यले केही विशेष व्यवस्था गरी ढुक्कसँग काराेवार गर्न सक्ने वातावरण तयार गराउन आग्रह गरेकाे छ ।

महासंघका अध्यक्ष महेश्वर कुमार श्रेष्ठले आज एक विज्ञप्ति जारी गर्दै काेराेना परीक्षण सहज रूपमा उपलब्ध हुनुपर्ने र डिलर सञ्चालक र ग्यास विक्रीवितरण तथा डेलिभरीमा खटिने कर्मचारीकाे अनिवार्य वीमा गरिनुपर्ने माग गरेका छन् ।

यसकाे साथै काराेबार निकै नै घटेर ग्यासबाट आत्मनिर्भर हुन नसक्ने अवस्था सृजना भएकाे भन्दै काराेबार पूर्ण रूपमा सहज नहुने बेला सम्म व्यवसायीहरुलाइ थप ५ प्रतिशत कमिसन व्यवस्था गर्नुपर्ने माग समेत गरेका छन् ।

पछिल्लाे समय फलामजन्य वस्तुमा काेराेना लामाे समय रहन सक्ने तथ्यले व्यवसायीहरूमा त्रास सिर्जना भएकाे समेत विज्ञप्तिमा उल्लेख छ ।