यही माघ १७ गतेदेखि १९ गते (फेब्रुअरी २९ देखि मार्चको २ तारिक) सम्म काठमाडौंको भृकुटीमण्डपमा सातौँ संस्करणको ‘नेपाल ल्याब एक्सपो, २०२४’ आयोजना हुँदैछ ।

नेपालमा प्रयोगशाला, वैज्ञानिक, विश्लेषणात्मक, अनुसन्धान र बायोटेक्नोलोजी क्षेत्रसम्बन्धी ज्ञान बाँड्ने उद्देश्यले यो एक्सपो आयोजना गरिँदै आएको एक्सपोका सह–आयोजक रसायन तथा मेडिकल आपूर्ति संघका अध्यक्ष भक्त हमालले जानकारी दिए ।

उनका अनुसार औषधि, अनुसन्धान र विकास, गुणस्तर नियन्त्रण, खाद्य प्रशोधन, शिक्षा, निदान, रसायन र सम्बन्धित क्षेत्रका आगन्तुकहरूको सहभागिता यो एक्सपोमा रहनेछ । २०० वटा स्टल रहने एक्सपोमा भारत, चीन, कोरिया र अन्य विभिन्न देशका उत्पादनका साथ प्रदर्शनकर्ताहरू नेपाल आउनेछन् । स्वास्थ्य क्षेत्रमा केही नयाँ गर्ने सोच राखेकाहरूले यो प्रदर्शनी अनिवार्यरूपमा हेर्नुपर्ने उनको भनाइ छ ।

एक्सपो आयोजना गर्नुको उद्देश्य  देशभरिका स्वास्थ्य क्षेत्रमा कार्यरत सबै चिकित्सक र अस्पताल सञ्चालकहरूलाई नयाँ प्रविधि र प्रयोगबारे जानकारी दिनु रहेकाे बताइएकाे छ । हिँजोका दिनमा मेडिकलसम्बन्धी विभिन्न इक्विपमेन्टहरू हेर्न र त्यसबारे जानकारी लिन विदेश जानुपर्ने अवस्था रहेकाेमा अब भने नेपालमै सहज रुपमा याे मेला अवलाेकन गर्ने अवस्था बनेकाे छ ।

एक्सपोमार्फत आफूलाई चाहिएको सामानको टेक्नोलोजी र गुणस्तरबारे प्रत्यक्ष रूपमा राम्रोसँग अध्ययन गर्न सकिनेछ ।

यसपटककाे एक्सपोमा करिब २०० वटा स्टल रहनेछन् भने विदेशबाट समेत प्रदर्शकर्ताहरू आउनुहुनेछ ।