शहिद दिवसको अवसर पारेर नेपाल मदिरा व्यवसायी महासंघले देशभर नै रक्तदान कार्यक्रमको आह्वान गरेकोमा उत्साहपूर्ण सहभागिताको साथ रक्तदान कार्य सम्पन्न भएको छ ।
काठमाडौं उपत्यकामा मदिरा व्यवसायी संघ काठमाडौं र मदिरा व्यवसायी संघ ललितपुर सहित महासंघले संयुक्त रुपमा रक्तदान कार्यक्रम आयोजना गर्यो ।

प्रदर्शनीमार्ग स्थित विणा चेम्बरमा आयोजना गरिएको रक्तदान कार्यमा नेपालमा सबैभन्दा बढी पटक रक्तदान गर्ने प्रेम सागर कर्माचार्यको समेत उपस्थिति रहेको थियो । नेपाल स्वयंसेवी रक्तदाता समाजका अध्यक्ष समेत रहेका कर्माचार्य लामो समय देखि निःस्वार्थ रुपमा रक्तदान कार्यमा संलग्न रहँदै आएका छन् ।

महासंघले अघिल्लो बर्ष देखि शहिद दिवसको अवसरमा रक्तदान कार्यक्रम शुरु गरेको हो । पछिल्लो समय मदिरा व्यवसायी महासंघ विभिन्न सामाजिक गतिविधिहरुमा केन्द्रित हुन थालेको छ । जसले गर्दा मदिरा व्यवसायीहरुलाई हेर्ने नजर समेत परिवर्तन हुँदै गएको छ ।
उता महासंघकै आह्वानमा मदिरा व्यवसायी समिति पोखराले आयोजना गरेकाे रक्तदान कार्यक्रममा ३० युनिट रगत संकलन भएको समितिका अध्यक्ष तारानाथ ढुंगानाले बताए ।

यसैगरी महासंघले फागुन ५ र ६ गते तेस्रो राजन स्मृति अन्तर मदिरा ब्याडमिन्टन प्रतियोगिता आयोजना गर्न लागेको छ । यसमा मदिरा व्यवसायी, उद्योगी र मदिरा आयातकर्ता सहभागि हुन पाउनेछन् । यसमा मेन्स सिंगल, मेन्स डबल र भेन्टास सिंगल गरी ३ किसिमका खेलहरु आयोजना हुनेछन् ।

स्मरण रहोस्, महासंघका केन्द्रिय सदस्य राजन सापकोटा कार्यसमिति सदस्य रहेको समयमा नै दुर्घटनामा मृत्यु भएको थियो । उनैको सम्झनामा ब्याडमिन्टन आयोजना शुरु गरिएको हो ।