भक्तपुर । मध्यपुर थिमी नगरपालिका वडा नम्बर ९ स्थित भुईचम्पादेवी नमुना टोल विकास संस्थाको दशौँ वार्षिक साधारण सभा भव्य रूपमा सम्पन्न भएको छ। भक्तपुरको निलबाराही रिसोर्टमा सम्पन्न उक्त साधारण सभामा टोलबासीहरूको उल्लेख्य उपस्थिति रहेको थियो।

साधारण सभाबाट बाबुराम थापा अध्यक्ष पदमा निर्विरोध निर्वाचित भएका छन् भन्ने जानकारी भुईचम्पादेवी नमुना टोल विकास संस्थाको निर्वाचन समितिले दिएको छ।

कार्यक्रममा बोल्दै निवर्तमान अध्यक्ष सुभाष जमरकट्टेलले संस्थाको स्थापना कालदेखि हालसम्मको यात्राबारे विस्तृत जानकारी गराएका थिए। उनले भुईचम्पादेवी नमुना टोल विकास संस्थाले आफ्नो लामो इतिहास रच्दै आजको अवस्थामा आइपुग्न सहयोग, सद्भाव र सहकार्य गर्नुहुने सम्पूर्ण अग्रज, टोलबासी तथा सरोकारवालाप्रति हार्दिक धन्यवाद व्यक्त गरे।

जमरकट्टेलले यस क्षेत्रको सडक, बाटो, खानेपानी, सुरक्षा व्यवस्था, भुईचम्पा मन्दिर निर्माण, फोहोरमैला व्यवस्थापन लगायतका विविध गहन विषयमा संस्थाले खेलेको भूमिकाबारे प्रष्ट पार्दै, संस्थाको निरन्तर प्रयासकै कारण आज मध्यपुर थिमी नगरपालिका वडा नम्बर ९ मा यो टोल व्यवस्थित रूपमा स्थापित हुन सफल भएको बताए।

उनका अनुसार संस्थाको मुख्य उद्देश्य नयाँ, सुशासनयुक्त समाज निर्माण गर्दै भुईचम्पालाई सफा, सुन्दर र हराभरा बस्तीका रूपमा विकास गर्नु रहेको छ।

साधारण सभाबाट निर्वाचित नयाँ कार्यसमितिमा अध्यक्ष बाबुराम थापा, उपाध्यक्ष दिपक कार्की, सचिव रेशम ठकुरी, सहसचिव बविता भट्ट तथा कोषाध्यक्ष सरीता राई रहेका छन्। त्यसैगरी सदस्यहरूमा तुलसा खड्का घिमिरे, खड्ग नारायण श्रेष्ठ, सौम्यता पोखरेल र थिरप्रसाद फुयाल चयन भएका छन्।

नवनिर्वाचित अध्यक्ष बाबुराम थापाले संस्थाको नेतृत्व सम्हाल्दै दिगो र व्यवस्थित बस्ती निर्माण गर्दै समाजलाई मध्यपुर नगरभित्रकै समुन्नत र उन्नत नमुना बस्तीका रूपमा विकास गर्नु आफ्नो प्रमुख लक्ष्य रहेको बताए।

थापाका अनुसार, विगतदेखि हालसम्म आइपुग्दा टोलमा धेरै सकारात्मक परिवर्तन भएका छन्। नयाँ बस्ती भएकै कारण सुरुका दिनमा विभिन्न असहज परिस्थिति भए पनि विभिन्न जिल्लाबाट आएका दाजुभाइहरूसँग समन्वय गर्दै आज संस्थालाई यो अवस्थामा ल्याउन सफल भएकोमा उनले सबैप्रति आभार व्यक्त गरे।

“अझै धेरै काम गर्न बाँकी छन्। मेरो नेतृत्वमा ती सबै काम पूरा गरेरै छाड्ने प्रतिबद्धता व्यक्त गर्दछु,” अध्यक्ष थापाले भने। उनले टोलमा रहेका अव्यवस्थित बाटो, ढल तथा नागरिकहरूका दैनिक समस्या समाधानलाई निरन्तरता दिनु संस्थाको प्रमुख दायित्व भएको पनि स्पष्ट पारे।

थापाले आफूलाई सर्वसम्मत नेतृत्व सुम्पिएकोमा खुशी व्यक्त गर्दै भने, “बिगतका अधुरा कामहरूलाई प्राथमिकतामा राखी आगामी दिनमा ती सबै कार्य सम्पन्न गर्ने योजनासहित यो जिम्मेवारी लिएको छु।”

उपाध्यक्षको जिम्मेवारी सम्हाल्दा आफूले गरेको काम, विशेषगरी भुईचम्पा मन्दिर निर्माण जस्तो पवित्र कार्य सफलतापूर्वक सम्पन्न गर्न सक्नु नै आज अध्यक्ष पदमा निर्वाचित हुन पाएको विश्वासको आधार भएको थापाको भनाइ थियो। उनले टोलबासीहरूले दिएको माया, स्नेह र विश्वासलाई कहिल्यै ठेस नपुग्ने गरी काम गर्ने प्रतिबद्धता व्यक्त गरे।

आगामी दिनमा खानेपानी, ढल, व्यवस्थित बत्ती, सुरक्षा व्यवस्था लगायतका क्षेत्रमा राजनीतिक दल र स्थानीय सरकारसँग समन्वय गर्दै भुईचम्पादेवी नमुना टोल विकास संस्थालाई मध्यपुर थिमी नगरपालिका वडा नम्बर ९ कै नमूनायोग्य टोल बनाउने लक्ष्यसहित अघि बढ्ने अध्यक्ष थापाले बताए।

कार्यक्रममा नेपाल सरकारका उपसचिव, वरिष्ठ पत्रकार, चार्टर्ड एकाउन्टेन्ट (CA) लगायत विभिन्न क्षेत्रका गन्यमान्य व्यक्तित्वहरूको उपस्थिति रहेको थियो। साधारण सभासँगै नयाँ कार्यसमिति चयन हुनुका साथै टोलबासीहरूको सहभागितामा पिकनिकलगायतका रमाइलो कार्यक्रमहरू समेत आयोजना गरिएको थियो।