पदयात्रा व्यवसाय सञ्चालनकाे लागि राज्य कोषमा राखिने धरौटी रकम वृद्धि हुन लागेको भन्ने हल्लाले यतिबेला पदयात्रा व्यवसायीहरु चिन्तित छन् । लकडाउनको कारण डामाडोल भएको व्यवसायमा यो विषय व्यवसायीहरुको लागि नयाँ चिन्ताको विषय बनेको छ ।

सामाजिक सञ्जालहरुमा अहिले ट्रेकिङ व्यवसाय सञ्चालनको क्रममा विगतमा कायम रहँदै आएको ५ लाख धरौटी रकम वृद्धि गरी ५० लाख पुर्याउने उल्लेख छ । यो हल्लाकै कारण अहिले व्यवसायीहरु माझ यसै विषयले खुवै चर्चा पाएको सुनिन्छ ।

पदयात्रा व्यवसायसँग जोडिएको यस विषयमा थप जानकारी लिन हामीले पदयात्रा व्यवसायीहरुको साझा संस्था टे«किङ एजेन्सी एसोसिएसन अफ नेपाल (टान)का अध्यक्ष खुम सुवेदीलाईसम्पर्क गरेका थियौं ।

सेतोघर डट कमसँगको छोटो कुराकानीको क्रममा अध्यक्ष सुवेदीले भन्नुभयो, ‘अहिले सामाजिक सञ्जालहरुमा जुन हल्ला चलेको छ, यो हल्ला आधिकारिक होइन । यस विषयलाई लिएर व्यवसायीहरु चिन्तित हुनुपर्दैन ।’

धरौटी रकम बढेको खण्डमा व्यवसाय टिक्न नसक्ने र ठूलो रोजगारी गुम्ने बताउँदै ऊहाँले मन्त्रालय मुलुकमा उद्यमशिलता विकास र रोजगारी सृजनाको पक्षमा रहेको समेत बताउनुभयो । साथै व्यवसायसँग जोडिएको यस्तो महत्वपूर्ण विषय व्यवसायीहरुसँगको छलफलबाट मात्र टुङ्गोमा पुग्ने विश्वास समेत व्यक्त गर्नुभयो ।

सरकारले एकतर्फी निर्णय गरेर धरौटी रकम बढाएको खण्डमा नेपालको पदयात्रा तथा पर्वतीय पर्यटन व्यवसाय नै धराशयी हुने भन्दै त्यो परिस्थिति सम्पूर्ण नेपालको लागि नै दुर्भाग्यपूर्ण हुने समेत सुवेदीले बताउनुभएको छ ।

साथै बजारमा हल्ला आएबमोजिम नै मन्त्रालयमा प्रस्ताव गरिएको भए त्यसलाई तत्काल सच्याएर सम्पूर्ण पदमार्ग क्षेत्रलाई जोगाउनुपर्ने समेत उहाँले बताउनुभयो ।

टानले सदैव अनिवार्य रुपमा सहयोगी साथमा लिएर पर्यटकहरु ट्रेकिङ कम्पनी मार्फत पदयात्रामा जानको लागि विगत लामो समय देखि नेपाल सरकार तथा पर्यटन मन्त्रालयसँग अनुरोध गर्दै आइरहेको कुरा पनि स्मरण गराउनुभएको छ ।