काठमाडौं, ३ वैशाखः बुधबारको सेयर बजारमा हरियाली देखिएको छ, नेप्से परिसूचक ७.०१ अंकले बढ्दै २६९६ विन्दुमा पुगेको छ। अघिल्लो दिनको तुलनामा बजारमा सामान्य सुधार देखिएको हो। कारोबारको क्रममा नेप्से २७०४ विन्दुमा पुगेर फर्किएको थियो।

यद्यपि परिसूचक उकालो लागे पनि कुल कारोबार रकममा भने केही कमी आएको देखिन्छ। अघिल्लो दिन ८ अर्ब ५४ करोड रुपैयाँको कारोबार भएकोमा आजको दिन ७ अर्ब २६ करोडमा सीमित रह्यो। कुल २४६ कम्पनीमध्ये १४७ कम्पनीको सेयर मूल्य बढेको छ भने ९७ कम्पनीको घटेको छ। बाँकी दुई कम्पनीको मूल्यमा कुनै परिवर्तन आएन।

उल्लेखनीय रूपमा, हाइड्रोपावर क्षेत्रमा लगानीकर्ताको चासो उच्च देखियो। यो क्षेत्र १.६३ प्रतिशतले उकालो लाग्यो। अन्य उकालो लाग्ने समूहहरूमा विकास बैंक (१.११%), बैंकिङ (०.३९%), निर्जीवन बीमा (०.५५%), जीवन बीमा (०.०५%) र व्यापार (०.११%) रहेका छन्।

यसैगरी, केही समूहहरूमा भने गिरावट देखिएको छ। फाइनान्स (०.६७%), होटल तथा पर्यटन (०.१६%), लगानी (०.३५%), उत्पादन (०.१६%), माइक्रोफाइनान्स (०.०६%) र अन्य समूह (१.०७%) ले ओरालो यात्रा गरे।

बजारमा पाँच कम्पनीको सेयर मूल्य १० प्रतिशतले बढ्यो, जसमा कर्पोरेट डेभलपमेन्ट बैंक, बलेफी हाइड्रोपावर, नेपाल माइक्रो इन्स्योरेन्स, राधि विद्युत्, र क्रेस्ट माइक्रोलाइफ इन्स्योरेन्स समावेश छन्।

त्यस्तै, ङादी ग्रुप पावरको सेयर मूल्य ७.४ प्रतिशत, ग्रिन डेभलपमेन्ट बैंकको ६.५ प्रतिशत, शिवश्री हाइड्रोपावर र हिमालयन पावर पार्टनरको ५.८ प्रतिशतले बढेको हो। गुराँस लघुवित्तको मूल्य ५.५ प्रतिशत र सिन्धु विकास बैंकको ४.३ प्रतिशतले घटेको छ।