गुमान बहादुर खड्का, व्यवस्थापक, जामुन बोट एग्रो फार्म
गल्कोट, बाग्लुङ । कृषि क्षेत्रबाट अधिकांश नेपाली युवाहरु विस्थापित हुँदै गएका छन् । यद्यपि केही व्यक्तिहरु भने पछिल्ला बर्षहरुमा कृषि क्षेत्रमा नयाँ सम्भावना देखेर ठूलो आशा र अपेक्षा सहित प्रवेश गर्ने क्रम पनि बढ्दो छ । समाजको लागि ती व्यक्तिहरुको भूमिका अतुलनीय छ ।
समाजमा सकारात्मक प्रयाशद्वारा सामाजिक रुपान्तरणको लागि केही पहल गर्नुपर्छ भन्ने मान्यताले हामी सञ्चार क्षेत्र मार्फत लामो समय देखि अभियानरत रहँदै आएका छौं । यसपटकको श्रृङ्खलामा बाग्लुङको गल्कोट नगरपालिका वडा नम्बर ५ स्थित नमुना बाख्रा फार्मको रुपमा स्थापित हुँदै गरेको जामुन बोट एग्रो फार्मको भ्रमण गरेर उक्त फार्मका व्यवस्थापक गुमान बहादुर खड्कासँग कुराकानी गरेर यो सामाग्री तयार पारेका हौं ।
गुमानसिँह खड्का अवकाश प्राप्त भारतीय सेना हुन् । उनले आफ्नो अवकाश पश्चात् कृषि क्षेत्रमा लगानी गरेर समाजमा उद्यमशिलता जागरणकाे क्षेत्रमा केही योगदान पुर्याउने सोचमा छन् ।
बाग्लुङको गल्कोट–५ मा सञ्चालनमा ल्याइएको उक्त फार्ममा हाल सानाठूला गरी हाल करिब ३ सय बाख्राहरु पालन गरिएको छ । साथै हाल सम्म उक्त करिब ३ करोड रकम लगानी भइसकेको उक्त फार्ममा हाल ५ जना व्यक्तिहरु रोजगाररत छन् ।
फार्मलाई पूर्ण क्षमतामा सञ्चालनमा ल्याइएको खण्डमा ८ सय भन्दा बढी बाख्राहरु सजिलै पाल्न सकिने गरी आधुनिक शैलिमा डिजाइन गरिएको उक्त फार्म निकै व्यवस्थित र आकर्षक छ । फार्ममा आफ्नो लागि आवश्यक पर्ने आवश्यक पर्ने अधिकांश विभिन्न प्रजातिका घाँसहरु समेत खड्का आफैंले उत्पादन गर्दै आएका छन् ।
खड्का कृषि कार्य सहज नरहेको अनुभव सुनाउँछन् । हाल फार्ममा एउटा जर्सी गाई समेत पालन गर्दै आएका उनले जर्सी गाईको उक्त दूध बाख्राका साना पाठाहरुलाई खुवाउँदै आएका छन् ।
खड्काले उत्कृष्ट प्रजातिका बोयर बोका तथा हाइब्रेड बाख्राहरु पालन गर्दै आएका छन् ।
नेपालमा सबैभन्दा बढी रेमिट्यान्स भित्रिने जिल्लाको परिचय बनाएको बाग्लुङका अधिकांश युवाहरु रोजगारीको लागि वैदेशिक भूमिमा छन् । कतिपय खाडि मुलुकहरुमा छन् त कतिपय विकसित मानिने जापान, कोरिया, अमेरिका लगायतमा छन् । यद्यपि स्वदेशमा नै उत्कृृष्ट व्यवसाय गरेर अन्य युवाहरुको लागि समेत नमुना बन्न सकिने मान्यताले निरन्तर अघी बढेका खड्काको प्रयाश निकै प्रशंसनीय छ ।
फार्मका आगामी योजनाः
व्यवसाय बिस्तार गर्ने क्रममा अन्य ठाउँमा समेत शाखा खोल्दै जाने खड्काको योजना छ । व्यवसाय शुरुवातको एक डेढ बर्षको अन्तरमा कम्पनी नाफामा जाने अवस्था नहुने भन्दै आफूले उत्कृष्ट भविष्य देखेर नै व्यवसायलाई गति दिइरहेको उनी बताउँछन् ।
विभिन्न डालेघाँस, पराल, नल लगायतलाई साना टुक्रा पार्ने मेसिन र एउटा गाडीको व्यवस्था गरेका खड्का कृषिलाई प्रतिष्ठित पेशाको रुपमा विकास गर्ने मान्यताले आफूहरु निरन्तर खटिँदै आएको दावी गर्छन् ।
गुमानसिंहले मुख्य नेतृत्व गर्दै आएको उक्त व्यवसायमा भिनाजु चन्द्र बहादुर खत्री मुख्य लगानीकर्ता हुनुहुन्छ। हाल भिनाजु जापानमा बसेर व्यवसाय गर्दै आउनुभएको छ । आफू वैदेशिक भूमिमा रहेर पनि स्वदेशकाे लागि केही प्रयत्न गर्नुपर्छ भन्ने मान्यताले उहाँले कृषि अन्तरगत बाख्रा पालन व्यवसाय नेपालमा सञ्चालन गर्नुभएहाे हाे ।
नेपालको लागि पर्यटकीय एवं सांस्कृतिक हिसाबबाट भविष्यमा राम्रो सम्भावना गल्कोट क्षेत्रमा उद्यमशिलता जागरणमा आफूहरुको प्रयाशले सकारात्मक सन्देश जान सकोस् भन्ने आफूहरुको मान्यता रहेको खड्काले बताए ।
