अक्कल तामाङ
अध्यक्ष, कल्याणकारी स्वयमसेवक संघ नेपाल 

कल्याणकारी स्वयमसेवक संघ नेपाल विभिन्न सामाजिक क्रियाकलापमा संलग्न संस्था हाे । लकडाउनसँगै कपन क्षेत्रलाइ लक्षित गरेर राहत वितरण गरिरहेकाे यस संस्थाले राहत लिन याेग्य व्यक्ति पहिचान गरेर मात्र राहत वितरण गर्दै आएकाे छ । यस संस्थाका अध्यक्ष अक्कल तामाङ राहतलाइ थप प्रभावकारी बनाउन राज्य पक्षले स्थानीय टाेल सुधार समितिलाइ जिम्मेवारी दिनु अझ प्रभावकारी हुने धारणा राख्नुहुन्छ ।

कल्याणकारी स्वयमसेवक संघ नेपाल कस्तो संस्था हो ?
यो एक सामाजिक संस्था हो, यसले जनजीवनलाई सहज बनाउन र समाजमा देखिएका समस्या न्यूनीकरण गर्ने कार्यमा आफ्ना गतिविधिहरु सञ्चालन गर्दै आइरहेको छ । अहिले लकडाउनको कारण जनजीवनमा सृजना भएको समस्यालाई लक्षित गरी कमजोर अवस्थाका व्यक्तिहरुलाई राहत तथा सहयोग उपलब्ध गराइरहेका छौं ।

 राहत किन बाँडिरहनुभएको छ ?
लकडाउनको कारण अहिले निकै धेरै मानिसहरु समस्यामा छन् । थुप्रै मानिसहरुको बिहानबेलुका चुलो बल्न नसक्ने सृजना भएको छ । जो रोगले भन्दा पनि भोकले बढी छटपटाइरहेका छन्, खाना बाँच्नको लागि आधारभूत आवश्यकता हो । यसलाई संविधानले पनि सुनिश्चित गरेको छ । कोही पनि भोको नरहुन् र कठिन परिस्थितिमा जीवनयापन सहज बनोस् भनेर हामीले राहत वितरण गरिरहेका छौं ।

कहिले बाट राहत वितरण गरिरहनुभएको छ ?
लकडाउन शुरु हुने बित्तिकै हामीले यो कार्य शुरु गरेका हौं । जनता साँच्ची पीडित भएको महसुस गरेर राज्यले यो कार्यक्रम सञ्चालन नगर्दै हामी अघी बढेका हौं ।

कुन क्षेत्रलाइ लक्षित गरेर राहत वितरण गरिरहनुभएको छ ?
हामीले स्वयमसेवी कल्याणकारी संघ मार्फत बुढानिलकण्ठ नगरपालिका अन्तरगत कपन क्षेत्रलाई लक्षित गरेर राहत वितरण गरिरहेका छौं । हामीले सञ्चालन गरिरहेको राहत तथा सहयोग कार्यक्रमले अहिले कोही पनि भोकै बस्नुपरेको छैन ।

राहत वितरण साँच्ची प्रभावकारी भइरहेको छ त ?
हामीले स्थलगत अध्ययन गरेर जसलाई साँँच्ची राहतको आवश्यकता छ, उनीहरुलाई नै राहत वितरण गरिरहेका छौं । यदाकदा सबल आर्थिक अवस्था भएका व्यक्तिहरुले पनि राहत पाउनु आफ्नो अधिकारको रुपमा बुझेको पाइन्छ । उहाँहरुलाई राम्रोसँग बुझाएपछि कतिपय व्यक्तिहरु राहत नलिइ फर्किनुभएको छ । हामीले बुझाएका पनि छौं कि राहत भनेको कमजोर अवस्थामा गरिने सहयोग हो । समग्रमा हेर्दा राहत कार्यक्रम प्रभावकारी नै भएको छ ।

सामाजिक कार्यमा तपाईंहरु कसरी प्रभावित हुनुभयो ?
जो व्यक्ति सक्षम छ त्यसले आफू भन्दा कमजोर व्यक्तिलाई सहयोग गर्दा पुण्य प्राप्त हुन्छ भन्ने कुरालाई हाम्रो धर्मले पनि आत्मसात् गरेको छ । साथै अप्ठ्यारो अवस्थामा प्राप्त भएको सानो सहयोगले पनि साँच्चिकै पीडितलाई ठूलो सहायता मिल्न सक्छ भन्ने कुरा म आफैंले पनि बुझेको छु । मेरो परिवारको आर्थिक अवस्था कमजोर भएको कारण मेरो बाल्यकाल निकै नै कष्टपूर्ण रुपमा बित्यो । मैले आफ्नो चाहना बमोजिम आफ्नो शैक्षिक कार्यक्रम समेत अघी बढाउन सकिन । अहिले म जुन बाटो अँगालेको छु, त्यो बाटोमा सफल छु । साथै सेवा भावलाई पनि सँगसँगै अघी बढाएको छु ।
सामाजिक कार्यमा हामी संगठित रुपमा लागिपरेका छौं । अहिले हाम्रो यस संस्थाले शिक्षा, स्वास्थ्य, सरसफाई लगायत अन्य विभिन्न क्षेत्रमा काम गरिरहेको छ । हामी स्वतःस्फूर्त रुपमा नै आवश्यकता बमोजिमका सामाजिक क्रियाकलापमा संलग्न हुँदै आएका छौं ।

लकडाउन खुलाउने बारे के भन्नुहुन्छ ?
परिस्थिति नियन्त्रणमा आउने सुनिश्चित भएपछि मात्र राज्यले लकडाउन खुकुलो बनाउँदै लैजानुपर्छ । अहिलेको परिस्थितिले हाम्रो अर्थतन्त्र निकै नै प्रभावित भएको छ । यसमा दुइमत छैन । यद्यपि
अहिलेको अवस्थामा नेपालमा निकै धेरै मानिसहरु रोजगारी गुमाएका छन् । बैंकमा रहेको रकम निकाल्न नसकेको अवस्था छ । औषधी उपचार गराइरहेका दीर्घरोगी, विद्यार्थी, श्रमिक लगायत सबैजसो व्यक्तिहरु पीडित भएको अवस्था छ । खासगरी विहानबेलुकीको चुल्हो बल्न नसक्ने अवस्थामा रहेका व्यक्तिहरुलाई लक्षित गरेर राहत प्रदान गरिँदै आइएको छ ।

सरकारबाट वितरण हुने राहत कार्यक्रमलाइ अझ प्रभावकारी बनाउन के गर्नुपर्ला ?
कुन टोलमा भएका कति व्यक्ति पीडित छन् भन्ने सम्बन्धमा तथ्यांक संकलन गरेर पीडित नछुट्ने गरी राहत वितरण गर्ने कार्यको जिम्मा सम्बन्धित टोल सुधार समितिलाई दिनुपर्छ जस्तो मलाई लाग्छ ।