फ्रान्सले विश्वको पाँचौँ ठूलो अर्थतन्त्र भारतसँग आकर्षक सम्झौतालाई हेरेका बेला राष्ट्रपति इम्यानुएल म्याक्रोनलाई बिहीबार भारतमा हात्तीको स्वागत परेडका साथ रातो कार्पेटले स्वागत गरिएको छ ।

भारतीय प्रधानमन्त्री नरेन्द्र मोदीले बिहीबार साँझ १९औँ शताब्दीका महाराजाको दरबारमा म्याक्रोनका लागि रात्रिभोजको आयोजना गर्नुहुनेछ र शुक्रबार उहाँ ट्याङ्क, ऊँट घोडचढी र लडाकू जेट फ्लाई पास्टसहित रङ्गीन सैन्य मार्चपासमा प्रमुख अतिथि हुनुहुनेछ ।

भारतको विदेश मन्त्रालयले नयाँदिल्ली र पेरिस ‘रणनीतिक साझेदार’ भएको बताएको छ भने फ्रान्सेली राष्ट्रपतिले आफ्नो भ्रमणले ‘कूटनीतिक र आर्थिक सम्बन्धलाई सुदृढ र गहिरो बनाउने’ बताउनुभयो ।

भारतीय रक्षा मन्त्रालयले अर्बौं डलरको सम्झौतामा फ्रान्समा निर्मित राफेल लडाकू जेट र स्कर्पेन श्रेणीका पनडुब्बीहरू खरिद गरेपछि फ्रान्सले आफ्नो सैन्य सम्झौतामा निर्माण गर्ने अपेक्षा गरेको छ ।

भारतीय मिडियाका अनुसार अमेरिकी राष्ट्रपति जो बाइडेनलाई गरिएको निमन्त्रणा स्वीकार गर्न असमर्थ भएपछि आउनुभएका म्याक्रोनले फ्रान्सले छ वटा इपिआर आणविक रिएक्टर बिक्री गर्न सक्ने अपेक्षा गर्नुभएको छ ।

गलामा फूलको माला पहिरिनुभएका म्याक्रोनले राजस्थानको जयपुरमा उत्रिएपछि दुवै मुलुकको झन्डा फहराउँदै गरेका स्कुलका छात्रछात्राहरूसँग हात मिलाउनुभयो । “फ्रान्समा धेरैभन्दा धेरै भारतीय विद्यार्थीहरू आउन् भन्ने हामी चाहन्छौँ”, उहाँले भन्नुभयो ।

मोदी गत जुलाईमा फ्रान्सको वार्षिक बास्टिल दिवस समारोहमा सम्मानित अतिथि हुनुहुन्थ्यो र म्याक्रोनले पनि यस्तै प्रकारले उहाँको स्वागत गर्नुभएको थियो ।

पेरिस र नयाँदिल्ली अन्तरिक्ष तथा उपग्रह प्रविधिमा सहकार्य गर्दछन् र फ्रान्सेली प्रतिनिधिमण्डलमा अन्तरिक्ष यात्री थोमस पेस्केट सहभागी हुनुहुन्छ । यस भ्रमणमा जुयपुरको १८औँ शताब्दीको जन्तरमन्तर खगोलीय अवलोकन स्थलमा जाने पनि कार्यक्रम छ ।

म्याक्रोनले शुक्रबार भारतको संविधानको ७५औँ वार्षिक दिवस तथा गणतन्त्र दिवसको अवसरमा नयाँदिल्लीमा सैन्य परेड अवलोकन गर्नुहुनेछ । सन् २०२३ मा भारतीय सैनिकहरूले पेरिसको सडकहरूमा मार्च गरेजस्तै फ्रान्समा निर्मित जेटहरू आकाशमा गर्जने क्रममा फ्रान्सेली टुकडी पनि उक्त सैन्य प्रदर्शनमा सहभागी हुनेछ ।

भ्रमणअघि फ्रान्सेली राष्ट्रपतिले भन्नुभएको थियो, “भारत अन्तर्राष्ट्रिय शान्ति तथा सुरक्षामा योगदान गर्ने प्रमुख साझेदार हो ।”

गत वर्ष म्याक्रोनले छिमेकी मुलुक बङ्गलादेश तथा श्रीलङ्काको भ्रमण गर्नुभयो र फ्रान्सलाई व्यापक एसिया–प्रशान्त क्षेत्रमा ‘पुनः प्रतिबद्ध’ गर्ने उद्देश्यले प्रशान्त भ्रमण पनि गर्नुभयो । फ्रान्सेली राष्ट्रपति अन्तिम पटक सेप्टेम्बरमा जी२० शिखर सम्मेलनका लागि भारत आउनुभएको थियो ।