इवामुरा अस्पताल भक्तपुरको सल्लाघारीमा सुलभ दरमा विरामीहरुको उपचार गर्ने उद्धेश्य बमोजिम स्थापना भएको अस्पताल हो । यस अस्पतालले २०१७ जनवरी देखि लायन्स आइ केयर एण्ड डाइबिटिज केयर सेन्टर सञ्चालन गर्दैै आएको छ । जहाँबाट ५० रुपियाँको टिकट काटेर आँखा जाँच गर्न सकिन्छ । यो सेवा विहान १० देखि दिउँसो १ बजे सम्म सञ्चालन हुँदै आएको छ । कमजोर आर्थिक अवस्थाका विरामीलाई निःशुल्क औषधी समेत अस्पतालले उपलब्ध गराइँदै आइएको छ ।

लायन्स क्लब अफ भक्तपुर समन्वयन समितिसँगको सहकार्यमा सञ्चालनमा ल्याइएको यस सेवाबाट हाल सम्म ३ हजार भन्दा बढीले चेकजाँच गरी लाभ लिएको अस्पतालका प्रबन्धक रंजित मारिखुले बताउनुभयो । हाल दैनिक कम्तीमा ५ जना व्यक्तिले यो सेवा लिइरहेका छन् ।

पछिल्लो समय अस्पतालले स्वास्थ्यको पहुँचमा नपु्गेका जनशक्तिलाई स्वास्थ्यको पहुँचमा ल्याउने मान्यता बमोजिम नियमित रुपमा निःशुल्क स्वास्थ्य शिविर समेत सञ्चालन गर्दै आएको छ । ५१ वेड क्षमताको इवामुरा अस्पतालले हाल स्वास्थ्य सेवामा विरामीको पहुँच विस्तारको निम्ति विशेष सहुलियतमा उपचार सेवा उपलब्ध गराउँदै आएको छ । यस अस्पतालले यसै चैत्र १ देखि लायन्स क्लब र भक्तपुर उद्योग वाणिज्य संघको सहकार्यमा निःशुल्क क्लिनिक समेत सञ्चालन गरेको छ । उक्त क्लिनिक भक्तपुर नगरपालिकाका नगरप्रमुख सुनिल प्रजापतिबाट उद्घाटन गरिएको हो । उक्त क्लिनिकबाट हाल दैनिक विहान ८ देखि १० बजे सम्म १० जना विरामीहरुले उपचार तथा परामर्श सेवा लिइरहेका छन्

।
ल्याप्रोस्कोपी सेवा समेत शुरु गरेको यो अस्पताल आगामी दिनमा अर्थोस्कोपी सेवा शुरु गर्ने योजनामा छ । दम, मुटु, नाक कान घाँटी लगायतका उपचारहरु अस्पतालमा लामो समय देखि सञ्चालनमा छन् ।