नेपाल निर्माण व्यवसायी महासंघ राज्यका नीतिहरुको कारण निर्माण सम्बन्धी कामहरु अलपत्र परेको भन्दै आज देखि आन्दोलनमा जाने भएको छ ।

मंसिर ४ गते काठमाडौंमा भएको निर्माण व्यवसायीहरुको भेलाले २५ बुँदे संशोधन र खारेजीका मागहरु समेटिएको ज्ञापनपत्र पत्रकार सम्मेलन मार्फत सार्वजनिक गर्दै आन्दोलन गरेर सरकारलाई आफ्ना मागहरु बारे गम्भीर बन्न ध्यानाकर्षण गराउने महासंघको कार्यक्रम छ ।

राज्यले समयमा सम्पन्न हुन नसकेका आयोजनाहरुमा म्याद थप नगरेको कारण साना ठूला गरी करिब २२ सय आयोजनाहरु अलपत्र अवस्थामा रहेको महासंघका अध्यक्ष रवि सिंहले पत्रकार सम्मेलनमा बताए ।

आन्दोलन कार्यक्रम अन्तरगत पहिलो चरणमा सोमबार देखि १ हप्ता सम्म हरेक दिन १ घण्टा प्रधानमन्त्री निवास वालुवाटारमा धर्ना बस्ने, मंगलबार देखि महासंघ, प्रदेश र जिल्ला स्तरीय संघहरु तथा निर्माण व्यवसायी फर्म कार्यालयमा कालो झण्डा राख्ने र व्यवसायीहरु कालो पट्टि बाँध्ने कार्य गरिनेछ ।

माग सम्बोधन नभए दोस्रो चरणमा माइतीघरमा प्रदर्शन, इजाजतपत्र सरकारलाई बुझाउने, बोलपत्र वहिष्कार गर्ने, हेभी इक्युपमेन्ट सहित सडकमा प्रदर्शन गर्ने तथा विकास निर्माणका कार्यहरु ठप्प पार्ने कार्यक्रम तय गरिएको छ ।