सरकारले विदेशी मुद्रा अपचलन मुद्दामा धरौटीमा छुटेका नेपाल वायुसेवा निगमका वरिष्ठ पाइलट (क्याप्टेन) सुवर्ण अवालेलाई तालिमका लागि सिंगापुर पठाउन अनुमति दिएको आजको नागरिक दैनिकमा सुशील भट्टराईको समाचार छ।

फौजदारी अभियोग लागेका क्याप्टेन अवालेलाई राजश्व अनुसन्धान विभाग, संस्कृति पर्यटन तथा नागरिक उड्यायन मन्त्रालय, नेपाल वायुसेवा निगम र  नेपाल नागरिक उड्यान प्राधिकरणले उडान लाइसेन्स अध्यावधिक गर्न सिंगापुर पठाउने अनुमति दिएका हुन्।

‘ती चार वटै निकायले मिलेमतो गरी क्याप्टेन अवालेलाई  तालिममा पठाउने निर्णय गरेका छन्,’ सम्बद्ध स्रोतले भन्यो,‘अवाली आगामी शुक्रबार राति साढे ११ बजे निगमकै जहाजबाट सिंगापुर जाँदैछन्। उनले त्यहाँ एक साता विताउनेछन्।’

स्रोतका अनुसार निगमका महाप्रवन्धक सुगतरत्न कंशाकारको जोडबलमा अवालेलाई तालिममा पठाउन अनुमति दिइएको हो। राजश्व अनुसन्धान विभागबाट अवालले नो अब्जेक्सन लेटर ल्याएपछि निगमले उनलाई उडान लाइसेन्स अध्यावधिक तालिम सिमुलेटर पठाउनपर्यटन मन्त्रालयसँगै अनुमति मागेको थियो।