प्रतिपक्षी दलकालाई त तैँले हिजो के पूर्वाधारको विकास गरेको थिइस् भनेर हप्काउँदा चुप लाग्छन्, सत्तापक्षकै नेताका छाडा गाली खानुपर्‍यो । मिटिङमा आच्छुआच्छु पार्छन्, सदनमा र्‍याखर्‍याख पार्छन्, सहनुपर्‍यो ।
प्रतिपक्षलाई पनि त्यस्तै मुस्किल । यस्सो केही भन्न हुन्न, आफू सरकारमा हुँदा के गर्‍याथिस् भनेर उल्टै हप्काउँछन् । आफूले यो गरेको थिएँ भनेर पत्ता लगाउनुपर्‍यो, सदनमा पेस गर्नुपर्‍यो । सडकमा कार्यकर्ता उफार्नुपर्‍यो, धर्ना गराउनुपर्‍यो, प्रहरीलाई जिस्क्याउनुपर्‍यो, गिरफ्तारी दिनुपर्‍यो, गिरफ्तारीको विरोध गर्नुपर्‍यो । यसो गर्दा सडकमा भीडभाड हुने भो, त्यसो गर्न पनि मिलेन ।

तँ कोरोना त बुद्धि पनि नभएको क्या ! हामी आनन्दले निदाइराखेका थियौँ, किन सुटुक्क नआएर हल्ला गर्दै चीन, इटाली, स्पेन, अमेरिका, भारत हुँदै चिच्याउँदै आएको ? किन टाढाटाढादेखि देखिने गरी आकाशमा धुवाँ पठाएको ? हामीले त कोरोना मुक्त देस भनिदिएकै थियौँ । अन्तिम अवस्थासम्म नेपालमा कोरोना छैन भन्दै विदेशी पर्यटकलाई बोलाइ रहेकै थियौँ । तेरो लागि यस्तो अनुकूल वातावरण नेपालमा हुँदाहुँदै पनि बडो हल्लाखल्ला गरेर नेपाल आउनुपर्छ ? चुपचाप सगरमाथाको बाटो हुँदै सुटुक्क झरेको भए हुँदैनथ्यो ? हामीलाई हेपेको ? कि तैँले वीर गोर्खाहरूको इतिहास पढेको छैनस् ? कि तैँले वीर बलभद्रको नाम सुनेको छैनस् ? कि तैँले अमरसिंह र भीमसेन थापाहरूको जीवनी पढेको छैनस् ?

हेर् कोरोना, हाम्रा कुरा सुन् ! सुनिनस् भने हामी थप कडा आपत्ति जनाउँछौँ, डब्लूएचओलाई बालुवाटारै बोलाएर धम्की दिन्छौँ । हामी यसैपालि तैँले पुराएको क्षतिभन्दा दस/बीस गुणा बढी उत्पादन गर्नेछौं । प्रत्येक प्रदेश र जिल्लामा अत्याधुनिक अस्पताल खडा गर्दै छौँ । अब हामी तीन चार पुस्तालाई समस्या नपर्ने गरि स्वास्थ्य क्षेत्रमा आत्मनिर्भर हुँदर्छौं । आखिर गफै दिने त हो नि !!! अब यस्तो प्रविधिको आविष्कार गर्छौँ जसबाट ढुंगाहरूमा लठ्ठीले हानेर कोरोना बिरुद्धको आवाजहरू निक्लनेछन् । खोक्छौँ, हाच्छ्युँ गर्छौं अनि मात्रै सुत्छौँ । हेर् कोरोना तलाई विश्व भ्रमण गर्नुनै थियो भने त्यो यात्राको सुरुवात नेपालबाट किन गरिनस्, त्यसो गरेको भए अहिले हामी शान्त भइसक्ने थियौँ । भनेको मान्, तँ जुन बाटो आइस् त्यही बाटो फरक्क फर्केर जा !!! चीनजस्तो ठूलो देशले मानेको छ हामीलाई । भारतले त झन् हामीलाई कति मान्छ कति । डोनाल्ट ट्रम्पले, भ्लादिमिर पुटिनले त हामीलाई भगवान् नै सम्झन्छन् तैलेचाहिँ के ठानेको हामीलाई ??? फेरि फेरि पनि तँलाई आउनुपर्ने भए नेपाललाई केही नगरी जा । होइन भने नेपालीले ज्ञानेन्द्र शाहीको चितवनमा ढाड भाँचे झैं भाच्नाल् र तेरो विश्वयात्रा यही समाप्त होला । यो मैले दुई तिहाईको म्यान्डेट लिएर बोलेको हुँ । हाम्रो एकमात्र मिसन तेरो ढाड भाँच्ने हो । कुरा बुझ् जताबाट आएको त्यतै आफ्नो बाटो कुद् ।