भद्रपुर (झापा), १३ चैत: चालु आर्थिक वर्षको पहिलो आठ महिनामा काँकडभिट्टाबाट कुल रु १२ अर्ब ७४ करोड १६ लाख बराबरको पेट्रोलियम पदार्थ आयात भएको छ।

यो गत आर्थिक वर्षको सोही अवधिको तुलनामा रु ६४ करोड १७ लाख ५९ हजार ले कम हो। गत वर्षको आठ महिनामा रु १३ अर्ब ३८ करोड ३३ लाख को पेट्रोलियम पदार्थ आयात भएको थियो।

मेची भन्सार कार्यालयका सूचना अधिकारी ईश्वरकुमार हुमागाईंका अनुसार आयातमा कमी आए पनि राजस्व संकलन भने बढेको छ। चालु आर्थिक वर्षको आठ महिनामा रु ६ अर्ब १२ करोड ४२ लाख राजस्व संकलन भएको छ, जुन अघिल्लो वर्षको तुलनामा ५.६ प्रतिशतले बढी हो। गत वर्ष सोही अवधिमा रु ५ अर्ब ८० करोड १८ लाख राजस्व संकलन भएको थियो।