कोरोना भाइरसको महामारीका कारण सबैभन्दा बढी प्रभावित भएको अमेरिकामा कोभिड–१९ बाट ज्यान गुमाउनेको संख्या ५० हजार भन्दा बढी पुगेको छ ।

जोन हप्किन्स विश्वविद्यालयको कोरोना भाइरस स्रोत केन्द्रका अनुसार अमेरिकामा हालसम्म कोभिड–१९ बाट कम्तिमा ५१ हजार १७ जनाको ज्यान गएको छ ।

अमेरिकामा तीन महिनाको अवधीमा कोभिड–१९ बाट यति धेरैको संख्यामा ज्यान गएको हो । पछिल्लो पटक थाहा भए अनुसार अमेरिकामा गएको फेब्रुअरी ६ मा कोरोना भाइरसका कारण पहिलो व्यक्तिको मृत्यु भएको थियो ।

पछिल्लो केही हप्तादेखि दैनिक दुई हजारको हाराहारीमा मानिसको ज्यान जाने गरेको छ । सबैभन्दा बढी प्रभावित भएको न्यूयोर्कको न्यूयोर्क सिटीमा अहिलेसम्म कम्तिमा १६ हजार ६४६ जनाको ज्यान गएको छ । हालसम्म संक्रमितको संख्या अमेरिकामा ८ लाख ९० हजार भन्दा बढी पुगेको छ । यस्तै ४६ लाख ९२ हजार भन्दा बढी अमेरिकीमा कोरोना भाइरसको संक्रमण रहे–नरहेको थाहा पाउन परीक्षण भएको छ ।

विश्वभर हालसम्म कोभिड–१९ बाट झण्डै एक लाख ९६ हजारजनाको ज्यान गएको छ । यस्तै संक्रमितको संख्या २७ लाख ९० हजार भन्दा बढी पुगेको छ । सबैभन्दा बढी प्रभावित हुने देशको सूचिमा दोस्रो स्थानमा रहेको इटालीमा २५ हजार ९६९ जनाको ज्यान गएको छ भने संक्रमितको संख्या एक लाख ९२ हजार ९९४ रहेको छ । स्पेनमा संक्रमितको संख्या दुई लाख १९ हजार भन्दा बढी छ र २२ हजार ५२४ जनाको मृत्यु भएको छ ।

फ्रान्समा ज्यान गुमाउनेको संख्या २२ हजार २७८ तथा संक्रमितको संख्या एक लाख ५९ हजार भन्दा बढी छ । एक लाख ४४ हजार भन्दा बढी संक्रमित रहेको बेलायतमा १९ हजार ५६६ जनाको ज्यान गएको छ । ५७ सय २३ जनाको ज्यान गएको जर्मनीमा संक्रमितको संख्या एक लाख ५४ हजार भन्दा बढी रहेको छ ।