काठमाण्डौ । त्रिभुवन विश्वविद्यालयका नवनियुक्त उपकुलपति प्रा. डा. केशरजंग बरालले पद बहाली गर्नुभएको छ । कीर्तिपुरस्थित उपकुलपति कार्यालय पुगेर उहाँले आज पद बहाली गरेका छन् ।

उनलाई निमित्त उपकुलपति प्रा. शिवलाल भुसालले पदवहाली गराएका हुन् । कार्यक्रममा त्रिविका शिक्षाध्यक्ष, रजिस्ट्रार, डिनहरूलगायत पदाधिकारी र प्राध्यापक, कर्मचारी सहभागी थिए ।

प्रधानमन्त्री तथा त्रिविका कुलपति पुष्पकमल दाहाल प्रचण्डले हिजो बराललाई त्रिविको नयाँ उपकुलपतिमा नियुक्त गरेका थिए । उनी यसअघि पोखरा विश्वविद्यालयका उपकुलपति थिए ।

शिक्षा विज्ञान तथा प्रविधि मन्त्री अशोक कुमार राईको संयोजकत्वमा रहेको छनोट समितिमा शिक्षा सचिव सुरेश अधिकारी र त्रिवि सभा सदस्य उपप्राध्यापक चन्द्रकला घिमिरे सदस्य थिए।

१९ औं उपकुलपति धर्मकान्त बाँस्कोटाको कार्यकाल सकिएसँगै त्रिभुवन विश्वविद्यालय कात्तिक १७ गतेदेखि उपकुलपतिविहीन थियो।