१)

दिल भित्र मेरो नाम केरेर के पायौ।

देखावटी अङ्गालोमा बेरेर के पायौ।

हुनु रहेछ टाढा र त बनायौ बहाना

देखाउँदै रिस र गाली गरेर के पायौ ।

२)

तिम्रो निम्ति मेरो माया सस्तो हुँदो रहेछ।

भनिदेऊ बिर्सिने उपाय कस्तो हुँदो रहेछ।

बुझ्दैछु मतलबी हुनुको कारणहरु आज

व्यर्थै म तिम्रो पिछा गरे जस्तो हुँदो रहेछ।

३)

बिना अर्थ धड्किने धड्कन सम्हालिदेउ।

अनि पल पल अत्तालिने मन सम्हालिदेउ

न यता न उता हुँदैछ मेरो जिन्दगी अचेल

खुसी दिउँला बदलामा जिवन सम्हालिदेउ।

४)

कसैसङ्ग मिठा मिठा बात मिल्यो होला।

जुनि जुनि नछुटिने साथ मिल्यो होला ।

धपक्क बलेकी रुपमती अनि खानदानी

र त कहिल्यै नबिर्सने याद मिल्यो होला।

५)

हाँछ्यु साँछ्यु कोरोना फाल्नु पर्छ रे।

अस्ति नै झरेको कालो तिलक टाल्नु पर्छ रे ।

पिएर पानी कोरोना उडाउ भन्छ ओलि बा

ए अँ साँच्चै हल्का बेसार पनि हाल्नु पर्छ रे।

६)

धड्कन भइदेउ म तिम्रो सास भइदिउला।

अनगिन्ती सपनाहरुको खास भइदिउला ।

बसन्तको फूल झैँ सुगन्ध छर्किर्दै हराबरा

जिवन भर हरियाली मधुमास भइदिउला ।

७)

तिता मिठा प्रेमका कुरा ल्याउछु अरे।

चाहिने जति सामन पुरा ल्याउछु अरे।

मलाइ बेहुली बनाइ भित्र्याउन उसले

सिंदुर पोते र रातो चुरा ल्याउछु अरे।

मुसि

थाहा नगर मकवानपुर

हाल साइप्रस