नेपाल चार्टड एकाउन्टेन्ट्स संघको ३६ औँ वार्षिक साधारणसभा मिति २०७८ बैशाख ४ गते शनिबार, विद्यमान कोभिड–१९को प्रकोपलाई मध्यनजर गर्दै भौतिक तथा अभौतिक रुपमा सदस्यहरुको सहभागितामा सम्पन्न भएको छ ।

शिक्षा, विज्ञान तथा प्रविधि मन्त्री श्री कृष्ण गोपाल श्रेष्ठको प्रमुख आतिथ्यता र नेपाल राष्ट्र बैंकका गर्भनर सिए महाप्रसाद अधिकारीको विशिष्ट आतिथ्यतामा सम्पन्न साधारणसभाले संघीयताको मर्म अनुरुप संघको संगठनात्मक संरचना तथा महिला समावेशिकरण सुनिश्चितता सहित सर्वसम्मत्त रुपमा विधान संशोधन पारीत समेत गरेको छ ।

साधारणसभामा बोल्दै प्रमुख अतिथि मन्त्री कृष्णगोपाल श्रेष्ठले संघको आफ्नै भवन निर्माणका लागि सहयोग गर्ने र चार्टड एकाउन्टेन्ट्स उपाधि प्राप्त विद्यार्थीहरुलाई त्रिभुवन विश्वविद्यालयबाट समकक्षता प्रदान गर्ने सम्बन्धमा रहेका द्धिविधाहरुको छिटो समाधानका लागि आवश्यक पहल लिने समेत प्रतिबद्धता जनाउनुभएको छ ।

सो कार्यक्रममा नेपाल राष्ट्र बैंक सिए प्रोफेसनबाट पहिलो गर्भनर सिए महाप्रसाद अधिकारी र ५० वर्र्षभन्दा बढि चार्टड एकाउन्टेन्ट्स प्रोफेसनमा योगदान पु¥याएबापत सिए टि.आर. उपाध्यायलाई सम्मान गरिएको थियो ।

साथै कार्यक्रमका विशिष्ट अतिथि, नेपाल राष्ट्र बैंकका गर्भनर तथा संघका पूर्वमहासचिव सिए महाप्रसाद अधिकारीले आर्थिक रुपान्तरणका लागि सिएहरुको योगदान अतुलनिय रहने बताउनुभयो । साथै उहाँले नेपाल राष्ट्र बैंकमा समेत सिएहरुको कार्यसम्पादन क्षमता तथा माग उच्च रहेको बताउनुभयो ।

उक्त कार्यक्रममा आइक्यान अध्यक्ष मदनकृष्ण शर्मा, महालेखा परीक्षक माननिय टंकमणी शर्मा, वरिष्ठ चार्टड एकाउन्टेन्ट्स टिआर उपाध्याय लगायतले एक्यानको गतिविधि सम्बन्धमा आफ्नो विचार राख्नुभएको थियो । आनन्द शर्माले अध्यक्षता गर्नुभएको कार्यक्रमको उद्घाटन सत्रको सञ्चालन सिभिरा लामा रुइत र बन्दसत्रको सञ्चालन तेजप्रसाद सुवेदीले गर्नुभएको थियो भने रमेश धितालले सम्पूर्ण सहभागी सदस्यलाई धन्यवाद सहित कार्यक्रम समापन गर्नुभएको थियो ।