मधुकर थापा उदयपुरका एक कृषि उद्यमी हुन् । लामो समय देखि सञ्चार क्षेत्रमा समेत संलग्न रहँदै आएका थापा  यसपटक  आफ्ना कृषिजन्य उत्पादन लिएर भृकुटीमण्डपकाे प्रदर्शनी मेलामा सहभागि भएका छन् ।

कृषि क्षेत्रलाई राज्यले महत्व दिन नसकेकोमा उनी चिन्तित छन् । नेपालमा राज्यले कृषिको अवस्था माथि उठाउने उद्येश्यले विभिन्न कार्यक्रम गर्दै आएको भएपनि सही किसान एवं उद्यमी राज्यबाट लाभ लिन नसकेको उनी तर्क गर्छन् ।

साना तथा घरेलु उद्योग महासंघ उदयपुरका जिल्ला अध्यक्ष समेत रहेका थापा कृषि व्यवसायमा विगत ५ बर्ष पहिले देखि संलग्न भएका हुन् ।

आफ्नो स्टलमा उनले मकैको च्याख्ला, कोदोको पीठो, सिलाम, बेसार लगायतका अर्गानिक उत्पादन प्रदर्शनीमा राखेका छन् । यी सबै उत्पादनलाइ विषादीरहित तवरले उनले उत्पादन गरेका छन् ।

उनी माछापालन, कुखुरापालन लगायतमा पनि संलग्न छन् ।

आफ्ना उत्पादनलाई विषादीरहित बनाउन आफैंले पशुपालन समेत गर्दै आएका पात्र हुन् उनी ।

नेपालको कृषिलाई आत्मनिर्भरमुखीबाट निर्यातमुखी बनाउनुपर्ने आवश्यकता महसुस गरेर उनले आफ््नो व्यवसाय सञ्चालन गर्दै आएका छन् ।

थापा उद्यमशिल सोच भएका व्यक्ति हुन् । यद्यपि विभिन्न बाह्य कारणहरूले व्यवसायीमा समस्या सृजना हुने उनी बताउँछन् ।

राज्यबाट समेत सहयोग पाउन सकेको खण्डमा कृषि क्षेत्रको व्यावसायिकरण एवं निर्यात गर्न समस्या नहुने उनको धारणा छ ।