२०८३ मंसिर ७ आइतबार

Nov 22 2026 Sunday

  • २०८३ मंसिर ७ आइतबार

२०८३ मंसिर ७ आइतबार

तेस्रो संस्करणको प्रधानमन्त्री कप क्रिकेटको उपाधी नेपाल पुलिस क्लबलाई

तेस्रो संस्करणको प्रधानमन्त्री कप क्रिकेटको उपाधी नेपाल पुलिस क्लबलाई

तेस्रो संस्करणको प्रधानमन्त्री कप एकदिवसीय राष्ट्रिय पुरुष क्रिकेट प्रतियोगिताको उपाधि नेपाल पुलिस क्लबले जितेको छ ।

विभागीय डर्बीमा त्रिभुवन आर्मी क्लबलाई ४ विकेटले पराजित गर्दै पुलिसले पहिलो पटक एकल रुपमा प्रतियाेगिताकाे उपाधि उचालेको हो ।त्रिवि क्रिकेट मैदान कीर्तिपुरमा शनिबार भएको फाइनलमा त्रिभुवन आर्मी क्लबलाई ४ विकेट ले पराजित गर्दै पुलिस च्याम्पियन बन्यो ।

आर्मीले दिएको १ सय २६ रनको सामान्य लक्ष्य पुलिसले ४०.३ ओभरमा ६ विकेट गुमाएर भेटायो ।

त्यसअघि पुलिसका पवन सर्राफ र ललितनारायण राजवंशीले घातक बलिङ गरेपछि टस जितेर ब्याटिङ गरेको आर्मीले ३३.३ ओभरमा सबै विकेट गुमाएर १ सय २५ रनमात्रै बनाउँन सक्यो। पवन र ललितले समान ४–४ विकेट लिए।

आर्मीका सोमपाल कामीले ३५, राजु रिजालले ३२, भीम सार्कीले २० र रोहित पौडेलले १८ बाहेक अन्यले दोहोरो अंक जोड्न सकेनन् ।

सुरुवात राम्रो गरेपनि आर्मीले त्यसलाई निरन्तरता दिन सकेन । पहिलो विकेटका लागि राजु रिजाल र सोमपाल कार्मीले ७२ रनको साझेदारी गरेका थिए । सोह्रौ ओभरको पाँचौ बलमा ललितले सोमपाललाई पवन सर्राफबाट क्याच गराए। ४० बल खेलेका सोमपालले ३ चौका र २ छक्का प्रहार गरे ।

अर्को ओभरले सागर ढकालको बलमा राजु रिजालले स्ट्रेटमा गरेको प्रहार कुशल भुर्तेलले समाते। मध्यक्रमका भरपर्दा ब्याट्सम्यान रोहित पौडेल पनि धेरैबेर क्रिजमा रहेनन् । २३ बल खेलेर २ चौका र एक छक्का प्रहार गर्दै १८ रन जोडेका उनलाई ललितले नै बोल्ड पारे।

२५औं ओभरमा हरिबहादुर चौहानलाई गुमाउँदा आर्मी १००–४ को स्थितिमा थियो। त्यसपछि २५ रन जोड्दा आर्मीले ६ विकेट गुमायो। पवन सर्राफले विनोद भण्डारी(१), भीम सार्की(२०),  कुशल मल्ल(०)लाई पवेलियन फर्काउँदा ललितले राजेश पुलामीमगर(३) र करण केसी(०)लाई एलबिडब्लुको सिकार बनाए।

पुलिसको जितमा ओपनर सुनिल धमलाले ४२ रन बनाउँदा अनिल श्रेष्ठले ४४रन बनाए । कप्तान मनजित श्रेष्ठनले नटआउट ११ रन जोडे।

प्रतियोगिताको तीनै संस्करणको फाईनल खेलेको आर्मीले उपाधि जित्न भने सकेन । अघिल्लो सिजन आर्मीलाई पराजित गर्दै एपीएफले उपाधि उचालेको थियो । पहिलो संस्करणको उपाधि पुलिस र आर्मीले संयुक्त रुपमा बाँडेका थिए ।

उपाधिसंगै पुलिसले २० लाख रुपैयाँ प्राप्त गरेको छ भने उपविजेता आर्मीले १० लाख रुपैयाँमा चित्त बुझाएको छ ।

प्रतिक्रिया दिनुहोस्
थप समाचार

© 2026 All right reserved to सेताेघर मिडिया नेटवर्क प्रा लि  | Site By : Sobij