ब्रह्माण्डले हामीलाई चमत्कारको लागि हर क्षण विभिन्न सङ्केतहरु पठाइरहेको हुन्छ । ती सङ्केतहरु बुझ्न र हरेक सङ्केत प्रति कृतज्ञता अनुभव गर्न सक्यौं भने हामी आफ्नो जीवनमा छिट्टै जादुमय बदलाव ल्याइरहेका हुनेछौं ।

लेखक एवं थेरापिष्ट फोलोरा कोलावो भन्नुहुन्छ, ‘जीवन अत्यन्तै रमाईलो र खेल्न योग्य छ, …..यसमा हामी जति बढी खेल्न सक्छौं, त्यत्ति नै बढी नयाँ कुराहरु आविष्कार समेत गर्न सक्छौं ।’

ब्रह्माण्डका सङ्केतहरु

हाम्रो जीवनलाई सधैं हराभरा र परिपूर्ण बनाउनको लागि ब्रह्माण्डले हामीलाई हर क्षण कुनै न कुनै सङ्केत पठाइरहेको हुन्छ । ती प्रत्येक सम्पन्नताका सङ्केतहरुलाई चिन्न र ती सङ्केत आफूलाई मिलेकोमा र छिट्टै उक्त सङ्केत बमोजिमका भौतिक वस्तु समेत आफूलाई मिल्ने ठानेर कृतज्ञ बन्दै गयौं भने हामी आफूले चाहेका वस्तुहरु साँच्ची प्राप्त गर्न सक्षम हुनेछौं ।

यदि तपाईं हामी यस अघिका २४ दिन सम्मका सामाग्रीहरु पढेर त्यसमा बताइएका अभ्यासहरुलाई समेत निरन्तर अपनाउँदै आएका छौं भने ब्रह्माण्ड एक चामत्कारिक भण्डार भएको अवश्य पनि बुझिसकेका हुनुपर्छ । ब्रह्माण्डको लागि ठूलो र सानो भन्ने हुँदैन । यदि यसले हामीलाई सय रुपियाँ उपलब्ध गराउन सक्छ भने लाख वा करोड पनि यसको लागि असम्भव हुँदैन । बरु हाम्रै सिमाबद्ध चेतन मष्तिष्कको कारण आफूलाई ठूलो उपलब्धिको लागि योग्य नमानेर हामी आफूले आफूलाई नै केवल साना उपलब्धिको लागि मात्र योग्य बनाएका हुन सक्छौं । अब ती सबै सिमाहरुलाई कृतज्ञता भाव र दृष्टिकोण परिवर्तनको माध्यमबाट भत्काई नयाँ फराकिलो पर्खाल निर्माण गर्न सक्दा रहेछौं भन्ने कुरा तपाईं हामीले बुझिसकेका छौं ।

जसरी ब्रह्माण्ड पूर्ण छ, त्यसरी नै हामी पनि पूर्ण छौं । पूर्णता हाम्रो अधिकार हो । कृतज्ञता भाव नै हामीलाई पूर्ण बन्ने दिशामा अघी बढाउने पहिलो खुड्किलो हो । कृतज्ञता भाव बढ्दै जाँदा हामीले ब्रह्माण्डीय आकर्षणको नियमको माध्यमबाट हामी भित्रका अवरोह (ब्लकेज)हरुलाई एक–एक गरेर हटाउन सक्छौं ।

ब्रह्माण्डीय सङ्केतको अभ्यास

यो अभ्यास एक सजिलो, रमाइलो र महत्वपूर्ण अभ्यास हो । हामी जहाँ पुग्छौं, त्यहाँ केही न केही हाम्रो लागि आवश्यक चिजहरु हामीले अवश्य देख्छौं । हामी आफूसँग अहिले त्यो चिज उपलब्ध नभएकोमा दुखी नहोउँ । बरु जुन चिज हामीले देखिरहेका छौं, त्यो चिज छिट्टै आफ्नो हुने अनुभव गरौं । आफू त्यस चिजको लागि हकदार रहेको मनमनै महसुस गरौं । उत्साहित होऔं । त्यस चिजका आकार, रङ, स्वाद लगायतलाई गहिरो रुपमा महसुस गरौं । मिल्छ भने नरम हातले बिस्तारै स्पर्श गरौं, गन्ध लिउँ, मिल्दैन भने आफ्नै हातले स्पर्श गरेको मनमनै महसुस गरौं ।

ब्रह्माण्डीय सङ्केतहरु

ब्रह्माण्डले हामीलाई जहिले पनि सङ्केतहरु दिइरहेको हुन्छ । किनकि ब्रह्माण्ड हाम्रो लागि मित्रवत् एवं मायालु छ । यसले जे गर्छ, सङ्केतको रुपमा काम गरेको हुन्छ । यसको कुरा गर्ने भाषा अलग्गै छ । हामीले ब्रह्माण्डीय भाषालाई बुझ्न सक्यौं भने हामी कहिल्यै निराश हुनुपर्दैन । बरु यसले हामी कति कृतज्ञ भाव महसुस गरेका छौं, त्यसको आधारमा हामीलाई प्रतिक्रिया उपलब्ध गराई हामीलाई आवश्यक चिज बढाइदिने वा हामीसँग उपलब्ध चिजहरु खोस्ने भन्ने तय गर्दछ ।

ब्रह्माण्डसँग खेल्ने तरिका

जब हामी बिहान अखबार पढ्न शुरु गर्छाैं वा कसैले पढिरहेको देख्छौं, शुरुमा मनमनै यो अनुभव गरौं कि आज हाम्रो लागि कुनै सुखद खबर प्राप्त हुनको लागि यो एक शक्तिशाली ब्रह्माण्डीय सङ्केत हुन सक्छ । यसको लागि आफैंलाई धन्यवाद दिउँ ।

यदि हामीलाई कुनै साथी वा आफन्तले भोजको निम्ति निम्तो दिन्छन् भने हामी आफू कत्ति सङ्कोच नमानी त्यसमा सरिक बनौं । यसले भोलिका दिनमा हामीलाई नै त्यसको आयोजक बन्नको लागि ब्रह्माण्डले सङ्केत उपलब्ध गराएको अर्थमा बुझौं । त्यस भोजमा सरिका भएका सबै प्रति मानसिक रुपमा कृतज्ञता प्रकट गरौं ।

यदि हामीसँग आफ्नो अलग्गै कार छैन, कसैले नयाँ डिजाइनको आकर्षक कार चढेर हाम्रो छेउबाट हिँडिरहेको छ भने हामी आफूलाई छिट्टै त्यो कारको मालिक बन्नको लागि ब्रह्माण्डले सङ्केत पठाएको महसुस गरौं र पूर्ण आनन्दित होऔं ।

बजारमा वा सुपरमार्केटमा हिँड्दा जे–जे वस्तु हामीले देख्छौं, सम्भव भए सम्म आफूलाई मन परेका हरेक वस्तुहरु प्रति कृतज्ञता प्रकट गरौं । ती वस्तुहरु छिट्टै आफूलाई कुनै न कुनै माध्यमबाट प्राप्त हुनको लागि नै ब्रह्माण्डले आफूलाई त्यस स्थानमा पठाएको सम्झेर पूर्ण कृतज्ञ बनौं ।

जब हामी गर्मी अनुभव गर्छौं, छिट्टै आफूलाई शितलता उपलब्ध हुने वा विगतमा शितलतामा रहँदाको आनन्द महसुस गरेर पुनः शिलतता भर्न सक्छौं ।

जब रात पर्छ, हामी पूर्ण निद्राको हकदार बनौं । साथै छिट्टै नयाँ दिन आफ्नो लागि उपहारको रुपमा प्राप्त हुने ठानेर कृतज्ञ बनौं ।

बिहान उठ्दा कसैले हामीलाई सम्बोधन गर्दै ‘शुभ विहानी…’ भन्छ भने त्यसलाई आज आफ्नो दिन उत्कृष्ट बन्नको लागि ब्रह्माण्डले पठाएको सङ्केत मानेर आफूलाई कृतज्ञताको गहिराईमा पु¥याउँ ।

जब हामी बैंक वा एटिएमको नजिक हुन्छौं, आफूलाई ब्रह्माण्डले बैंक र एटिएमको माध्यमबाट प्रशस्त पैसाको सङ्केत उपलब्ध गराउन लागेको ठानेर अत्यन्तै कृतज्ञ भाव महसुस गरौं ।

यसरी ब्रह्माण्डले हामीलाई हर क्षण, हर स्थानमा कुनै न कुनै रुपमा सङ्केत अवश्य पठाएको हुन्छ, जब हामी ब्रह्माण्डको भाषा नै सङ्केत भएको बुझेर आफू ती सङ्केत अनुसार कृतज्ञ बन्दै गएको महसुस गर्न सक्छौं, केही हप्ता वा महिनामा नै हामीले आफ्नो जीवनमा अकल्पनीय सुधार आइरहेको आफैंले अनुभुति गर्न थाल्नेछौं ।

ब्रह्माण्डीय सङ्केतहरुबाट कुन–कुन क्षेत्रमा लाभ लिन सकिन्छ ?

हामी ब्रह्माण्डीय सङ्केतहरुलाई आफ्नो शरीरको तौल सन्तुलित अवस्थामा कायम राख्न, आफूलाई पूर्ण स्वस्थ बनाउन, चाहेजस्तो जागिर प्राप्त गर्न, चाहेजति आर्थिक उपलब्धि हासिल गर्न, भौतिक सम्पत्ति (घर, गाडी, सुन लगायत) उपार्जन गर्न, चिन्ताबाट मुक्त हुन, आफूले चाहेजस्तो जीवनसाथी खोज्न, कार्यालयका साथीहरुसँग राम्रो सम्बन्ध कायम गर्न, छिट्टै आफ्नो पदोन्नति गर्न, आफ्नो क्षेत्रमा उत्कृष्ट बन्न, सफल उद्यमी बन्न लगायत हरेक क्षेत्रमा प्रयोगमा ल्याउन सक्छौं ।

यो पनि याद गरौं

ब्रह्माण्डलाई सम्पन्नताको सङ्केत पठाउने क्रममा हामी उक्त चिज कसरी हामीलाई उपलब्ध हुन सक्ला भन्ने सोचेर चिन्तित नहोउँ । हामी साँच्ची विश्वस्त हुन सक्यौं र आफ्नो अवचेतन मष्तिष्कलाई त्यो चिजको आफू हकवाला भएको विश्वास दिलाउन सक्यौं र लामो समय त्यही अवस्थालाई नै कायम राख्न सक्यौं भने विशाल ब्रह्माण्डले हामीलाई विभिन्न वस्तु, परिस्थिति वा घटना सृजना गरेर त्यो चिज हामीसम्म पु¥याउन सहयोग गर्नेछ ।

आजको अभ्यास

– आज यस अघि कृतज्ञता प्रकटको लागि डायरीमा टिपोट गरेका सबै सकारात्मक बुँदाहरु एकपटक पढौं । ती सबै बुँदाहरुमा आफू ती चिजको लागि कृतज्ञ रहने कारण खोजेर खुसी साथ धन्यवाद भाव व्यक्त गरौं । त्यो सूचीमा आज कृतज्ञता प्रकट गर्न थप १० चिजहरु समावेश गरौं ।

– आज हामीले आफ्नो वरपर वा यात्राको क्रममा देख्ने र आफूलाई सुखद अनुभव हुने कम्तीमा ७ ओटा चिज वा अवस्थालाई टिपोट गरौं ।

जस्तो कि, यदि हामीले नयाँ डिजाइनको आकर्षक कार देख्छौं भने मनमनै अनुभव गरौं कि
‘मेरो आफ्नै आकर्षक कार प्राप्त गरेकोमा म हृदय देखि नै कृतज्ञ छु । धन्यवाद, धन्यवाद, धन्यवाद ।

यदि हामीले अत्यन्त आकर्षक र मनमोहक व्यक्ति भेट्छौं भने मनमनै अनुभव गरौं कि
‘मेरो व्यक्तित्व दिनदिनै आकर्षक बन्दै गएकोमा म हृदय देखि नै कृतज्ञ छु । ब्रह्माण्डीय शक्ति प्रति धन्यवाद, धन्यवाद, धन्यवाद ।

– ओछ्यानमा सुत्नु भन्दा पहिले दोस्रो दिनको चमत्कारी पत्थर हातमा लिएर आजको दिन सुखद बनेकोमा खुसी व्यक्त गरौं । आजका दिनभरका हरेक सुखद यादहरु कम्तीमा १० ओटालाई सम्झेर खुसी र कृतज्ञ भाव सहित विश्राम लिउँ ।

हामीहरु सबैको आजको दिन शुभ रहोस् । साथै हरेक दिनहरु यसरी नै सुखद बन्दै जाउन् । हार्दिक कृतज्ञता सहित । धन्यवाद धन्यवाद ।। धन्यवाद ।।

• कमल पन्थी