
पाकिस्तानले आफ्नो भुमि माथि आक्रमण गर्न आएको भारतीय वायु सेनाका विंग कमान्डर अभिनन्दन वर्तमानलाई भारतलाई नै जिम्मा लाउने भएको छ | आफ्नो कब्जामा रहे पनि पाकिस्तानी प्रधानमन्त्री ईमरान खानले अभिनन्दनलाई रिहा गर्ने भन्दै भारत संग शान्ति पूर्ण वार्ता गर्न तयार रहेको बताएका छन् |
भारतीय वायु सेनाका विङ्ग कमाण्डर अभिनन्दन बुधबार लडाकु विमान मिग–२१ लिएर पाकिस्तानी सीमामा छिरेका थिए । उनले उडाएको विमानलाई पाकिस्तानी वायु सेनाले खसालेर उनलाई कब्जामा लिएको थियो ।
पाकिस्तानी सेनाले अभिनन्दन आफूहरुसँगै भएको ठिक अवस्थामा रहेको बताएको छ । एउटा भिडियोमा अभिनन्दनले भनेका छन्, ‘मेरो नाम अभिनन्दन हो । म विङ्ग कमाण्डर हूँ । मेरो सभिर्स नम्बर २७९८१ हो । म एक फ्लाइङ पाइलट हूँ ।’
त्यस्तै अर्को एउटा भिडियोमा अभिनन्दनले चिया पिइरहेका देखिन्छन् । उनीसँग कसैले प्रश्न गरिरहेका हुन्छन् भने उनले सरासर त्यसको जवाफ दिइरहेका हुन्छन् । त्यस भिडियोमा अभिनन्दनले आफूलाई पाकिस्तानी सेनाले राम्रो व्यवहार गरेको बताउँदै भारत फर्केर पनि त्यही भन्ने बताएका छन् ।
अभिनन्दनका बुवा पनि भारतीय वायु सेनामा थिए । उनका भाइ पनि वायु सेनामा नै रहेको बीबीसीले जनाएको छ ।
© 2026 All right reserved to सेताेघर मिडिया नेटवर्क प्रा लि | Site By : Sobij