२०८३ मंसिर ७ आइतबार

Nov 22 2026 Sunday

  • २०८३ मंसिर ७ आइतबार

२०८३ मंसिर ७ आइतबार

आफु माथि लागेको आरोप पुस्टि होस् : विष्णु पौडेल

आफु माथि लागेको आरोप पुस्टि होस् : विष्णु पौडेल

नेपाल कम्युनिष्ट पार्टी (नेकपा)का महासचिव विष्णु पौडेलले आफूमाथि लागेको आरोप पुष्टि गर्न सबैलाई आह्वान गर्नुभएको छ ।

प्रधानमन्त्री निवास बालुवाटार नजिकै रहेको ललिता निवासको जग्गाको विषयमा आफूमाथि अनर्गल आरोप लगाइएको भन्दै त्यसको पुष्टि गर्न विज्ञप्तिमार्फत उहाँले आह्वान गर्नुभएको हो ।

सरकारी जग्गा हिनामिनामा आफ्नो संलग्नता नरहेको दाबी गर्दै उहाँले ललितानिवास परिसरको कित्ता नं. ३०९ को आठ आना जग्गा आफ्नो छोरा नवीन पौडेलको नाममा कानुनबमोजिम नै खरिद गरिएको बताउनुभयो ।

मालपोत कार्यालयले खरिद बिक्री गर्न मिल्ने यकिन गरेपश्चात उमा ढकाल र माधवी सुवेदीको नाममा रहेको जग्गा आफूहरुले लिखत पारित गरी लाग्ने राजश्व बुझाएरै खरिद गरेको उहाँले बताउनुभयो ।

सरकारी जग्गा हडप्ने मनसायले कागज श्रेस्ता मिलाई किर्ते, जालसाजी वा गैरकानुनी कार्य गरी जग्गा दर्ता गर्ने वा गराउने कुनै पनि कार्यमा आफू र आफ्नो परिवारका कुनै पनि सदस्यको प्रत्यक्ष वा अप्रत्यक्ष संलग्नता नरहेको र कहिल्यै पनि नरहने पनि उहाँले अवगत गराउनुभएको छ । सरकारी जग्गा हडप्नेजस्ता अपराधजन्य गतिविधि आफूले सोच्नसमेत नसक्ने उहाँले प्रष्ट पार्नुभयो ।

२०६१ पुस २९ गते जग्गा खरिद गरेको र त्यो बेला आफू मन्त्री, सांसद वा कुनै पनि तहको जनप्रतिनिधिको जिम्मेवारीमा नरहेको पनि उहाँले स्पष्ट पार्नुभएको छ ।

नवलपरासी जिल्लाको बर्दघाट नगरपालिका वडा नम्बर १० साविक तिलकपुर गाउँ विकास समिति, वडा नम्बर–३) स्थित श्रीमतीको नाममा रहेको ८ कट्ठा जग्गा २०६१ असोज २४ गते बिक्री गरी प्राप्त स्रोतबाट ललिता निवासको ८ आना जग्गा खरिद गरिएको पनि उहाँले खुलाउनुभयो ।

संविधानसभा सदस्यमा २०६४ सालमा रुपन्देही जिल्लाबाट निर्वाचित भएपश्चात् ललिता निवासको जग्गाबारे वार्षिक सम्पत्ति विवरणमा उल्लेख गर्दै आएको पनि उहाँले बताउनुभयो ।

बालुवाटारको जग्गा हिनामिनाका सम्बन्धमा सरकारले आवश्यक कमद चालिसकेको भन्दै उहाँले सरकारले चालेको कदमलाई पनि स्वागत र समर्थन गर्नुभएको छ ।

प्रतिक्रिया दिनुहोस्
थप समाचार

© 2026 All right reserved to सेताेघर मिडिया नेटवर्क प्रा लि  | Site By : Sobij