डा.केसीको माग विपरित प्रधानमन्त्रीद्वारा केयूको उपकुलपति नियुक्त गर्न समिति गठन


काठमाडौं । १७ दिनदेखि अनसनरत डा.गोविन्द केसीका माग विपरित प्रधानमन्त्री पुष्पकमल दाहालको अध्यक्षतामा १३ मंसिरमा बसेको काठमाण्डौ विश्वविद्यालयको सिनेट बैठकले उपकुलपति नियुक्त गर्न छनौट समिति गठन गरेको छ ।

विश्वविद्यालयका कुलपति समेत रहेका दाहालको निर्देशन अनुसार केयूको आगामी कार्यकालका लागि उपकुलपति नियुक्त गर्न शिक्षामन्त्री संयोजक रहने गरि दुई सदस्यीय छनोट समिति गठन गरिएको हो ।

समितिका सदस्यहरुमा केयू संरक्षण समितिका अध्यक्ष दमननाथ ढुङ्गाना र सोही समितिका सदस्य सुरेशराज शर्मा मनोनित गरिएका छन् । छनौट समितिलाई केयूको उपकुलपति नियुक्त गर्न योग्य व्यक्ति सिफारिस गर्ने अधिकार हुन्छ ।

विश्वविद्यालयको ७५औँ सिनेटमा केयूको उपकुलपति नियुक्त गर्ने विषय ‘विविध’ शिर्षकमा राखेर आकस्मिक रुपमा छनौट समिति गठन गरिएको छ । केयू प्राध्यापक संघका पूर्व अध्यक्ष डा.विभूती रञ्जन झाले हालका उपकुलपति डा.रामकण्ठ मकाजुलाई नै पुनः उपकुलपतिमा नियुक्त गर्न चलखेल भइरहेको बताए । उपकुलपति मकाजुलाई आफ्नो कार्यकालमा विश्वविद्यालयको मर्यादा र गरिमा कायम गर्न नसकेको आरोप लाग्दै आएको छ ।

१७ दिनदेखि आमरण अनशनरत डा. गोविन्द केसीले उपकुलपति सिफारिस समितिमा राजनीतिक भागबन्डामा नपरेका गैरराजनीतिक व्यक्ति सम्मिलित हुनुपर्ने माग राखेका छन् । तर डा.केसीको नौ नम्बर बुँदाको माग विपरित उपकुलपति छनौट समितिमा प्रधानमन्त्री दाहालको निर्देशनमा राजनीतिक व्यक्ति छनौट गरिएको छ ।

सिनेट बैठकमा केयू प्राध्यापक संघका अध्यक्ष बेदमणी दाहालले छनौट समिति गठनको विषय विविध शिर्षकमा राखिएको भन्दै अग्रिम जानकारी नदिइएकोमा आपत्ति जनाएका थिए । बैठकमा उनले डा.केसीको माग अनुसार छनोट समितिमा स्वतन्त्र विज्ञहरु राख्नुपर्ने धारणा राखेका थिए ।

प्रधानमन्त्री दाहालले छनौट समितिमा राजनीतिक व्यक्ति नियुक्त गरेको बारे स्पष्ट जवाफ दिएनन् । विश्वविद्यालय ऐनमा संरक्षण समितिले उपकुलपति छनौट समितिका पदाधिकारी मनोनयन गर्न सक्ने व्यवस्था छैन् ।

स्रोतका अनुसार सम्बन्धनको पखाईमा रहेको बिर्तामोडस्थित बी. एण्ड सी. मेडिकल कलेजलाई केयूबाट सम्बन्धन दिनका लागि प्रधानमन्त्री दाहालको निर्देशनमा उपकुलपति पुनः मकाजुलाई नै नियुक्त गर्ने तयारी भइरहेको छ ।

त्यसो त उपकुलपति छनौट समितिका सदस्यमा मनोनित ढुङ्गाना समेत उपकुलपति पदका लागि पुनः मकाजुलाई नै नियुक्त गर्ने पक्षमा छन् ।

Comment

Related News 

© 2016 All right reserved to

%d bloggers like this: