यु–१९ एसिया कपको पहिलो खेलमा नेपालको भिडन्त भारतसँग



काठमाडौं । बंगलादेशमा आयोजना हुने यु–१९ एसिया कपमा नेपालले आफ्नो पहिलो खेलमा चिरपरिचित प्रतिद्वन्द्वी भारतसँग प्रतिस्पर्धा गर्ने भएको छ ।

शनिबार (भोलि)देखि सुरु हुने उक्त प्रतियोगितामा टेस्ट राष्ट्र टोली भारतलाई पराजित गर्ने लक्ष्यसहित नेपाली टोली मैदानमा उत्रनेछ ।

गत संस्करणको समूह चरणको खेलमा नेपालले भारतलाई पराजित गर्दै सनसनी मच्चाएको थियो । मलेसियामा भएको उक्त प्रतियोगितामा नेपालले भारतलाई १९ रनले पराजित गरेको थियो ।

त्यतिबेलाको प्रतियोगितामा नेपाल पहिलोपटक सेमिफाइनलमा पुग्न सफल भएको थियो ।

गत संस्करणको खेलमा भारत नेपालसँग पराजित भएसँगै समूह चरणबाटै बाहिरिएको थियो ।

प्रतियोगितामा नेपाल समूह ‘ए’मा परेको छ । नेपालको समूहमा भारत, अफगानिस्तान र संयुक्त अरब इमिरेट्स (युएई) छन् । त्यस्तै, समूह ‘बी’मा श्रीलंका, बंगलादेश, पाकिस्तान र हङकङ छन् ।

एसिया कप हुनुअघि भारतमा भएको एकदिवसीय सिरिजमा नेपाल भारतको ‘ए’ र बी दुबै टोलीसँग पराजित भएको थियो । त्यस्तै, अफगानिस्तानविरुद्धको खेलमा भने नेपाल विजयी भएको थियो ।

त्यसपछि तेस्रो स्थानका लागि भएको भिडन्तमा नेपाल अफगानिस्तानसँग पराजित भएको थियो ।

नेपाली टोलीमा कप्तानको भूमिका मोहम्मद आसिफ शेखले निर्वाह गर्नेछन् भने उपकप्तान कमल सिहं ऐरी छन् ।

टोलीका अन्य खेलाडीमा रोहितकुमार पौडेल, रवी शाह, सूर्य तामाङ, पवन शर्राफ, रवीन्द्रजंग शाही, रसिद खान, भीम सार्की, तृतराज दास, सन्दीप जोरा, नन्दन यादव, रीत गौतम, सागर ढकाल र अरुण ऐरी छन् ।

टोलीको मुख्य प्रशिक्षकमा विनोद दास छन् । सहायक प्रशिक्षकमा मनोज कटुवाल छन् ।

दुवै समूहका शीर्ष दुई टोलीले सेमिफाइनलको यात्रा तय गर्नेछन् । रासस

Comment

Related News 

ताजा अपडेट

© 2016-2018 All right reserved to सेताेघर मिडिया नेटवर्क प्रा लि | Site by : SobizTrend Technology

%d bloggers like this: