अर्थतन्त्रमा अटोमोवाइल क्षेत्रको योगदान


देशको अर्थतन्त्रमा अटोमोवाइलक्षेत्रको योगदान । अटोमोवाईल क्षेत्र एउटा बृहतक्षेत्र मात्र नभई नेपाली अर्थतन्त्रको मेरुदण्ड हो भन्ने कुरामा कुनै सन्देह छैन । अटोमोवाइल क्षेत्रले विभिन्न शीर्षक मार्फत देशको कूल राजश्वमा १७ प्रतिशत र कूल कर राजश्वमा २० प्रतिशत योगदान पुर्याएको छ । सरकारले आर्थिक बर्ष २०७२÷७३ मा भन्सार विन्दुबाट १ सय ९४ अर्व (भन्सार, अन्तःशुल्क र मूल्य अभिवृद्धिकर) राजश्व उठाएकोमा अटोमोवाइल क्षेत्रबाट मात्रै ६० अर्व राजश्व उठेको छ, जुन कूल भन्सार राजश्वको ३२ प्रतिशत हुन आउछ । यो बाहेक आर्थिक बर्ष २०७२÷७३ मा सडक मर्मत संभार दस्तुर तथा सवारी साधनकर लगायत नवीकरण दस्तुरहरुबाट १४ अर्व राजश्व संकलन भएको छ । पेट्रोलियम पदार्थमा लगाइएको सडक मर्मत शुल्कबाट मात्रै पनि बार्षिक ४ अर्व भन्दा बढी राजस्व उठने गरेको छ ।

यसरी समग्रमा हेर्दा आर्थिक बर्ष २०७२÷७३ मा अटोमोवाइल क्षेत्रबाट मात्रै सरकारले न्यूनतम ८० अर्ब भन्दा बढी राजश्व प्राप्त गरेको छ । जसमा टायरट्युव, लुव्रिकेण्ट्स र व्याट्रीको आयातबाट प्राप्त हुने राजश्व समावेश गरिएको छैन । यसरी देशको कूल ग्राहस्थ उत्पादनमा अटोमोवाइल क्षेत्रले राजश्व मार्फत ४ प्रतिशत योगदान दिएको छ । पुँजी निर्माणमा समेत अटोमोवाइल क्षेत्रको भूमिका महत्वपूर्ण रहि आएको छ । आर्थिक बर्ष २०७२÷७३ मा मात्रै अटो इन्सुरेन्स मार्फत ६ अर्व भन्दा बढी बीमा शुल्क बीमा कम्पनीहरुले संकलन गरेका छन् । जुन समग्र बीमा बजारको ४५ प्रतिशत हुन आउँछ । राष्ट्रिय पुँजी निर्माणमा यातायात क्षेत्रको भुमिकालाई मध्यनजर गर्दे यस क्षेत्रलाई विलासिताको वस्तुबाट आवश्यकताको वस्तुमा परिणत गर्नु पर्ने आवश्यकता तडकारो रुपमा देखा परेको छ । अहिले करिव २३ लाख यातायातका साधनहरु मार्फत अटोमोवाइल क्षेत्रले १७ लाख भन्दा बढी नेपालीलाई रोजगार समेत उपलब्ध गराएको छ ।
यसरी रोजगारीको माध्यमबाट पनि अटोमोवाइलक्षेत्रले राष्ट्रिय अर्थतन्त्रमा महत्वपूर्ण योगदान दिएको छ । रोजगारीको लागि विदेश पलायन हुनु पर्ने नेपालीहरुको वाध्यतालाई अटोमोवाइल क्षेत्रल केहि हदसम्म भए पनि कम गरेको देखिन्छ । अहिले अटोमोवाइल क्षेत्रले मात्र विभिन्न तह र क्षेत्रमागरी बार्षिक करिव ५० हजारको संख्यामा रोजगारी उत्पन गर्ने गरेको छ भन्न कुनै कठिनाई छैन । आज अटोमोवाइल क्षेत्र राष्ट्रिय अर्थतन्त्र र रोजगारीको मेरुदण्ड भएपनि अटोमोवाइल क्षेत्रलाई हेर्ने सरकारी दृष्टिकोणमा अझै परिवर्तन आउन सकेको छैन । अटोमोवाइल क्षेत्रसंग सम्बन्धित नीतिगत विषयहरुमा नाडाको अत्यन्त कम संलग्नता हुनुले यसलाई प्रमाणित गर्दछ ।
कृष्णप्रसाद दुलाल नाडा अटोमोवाइल्स एशोसिएसन अफ नेपालका महासचिव हुन्

Comment

Related News 

© 2016 All right reserved to

%d bloggers like this: